Kryetari i opozitës OBRM-PDUKM, Hristijan Mickoski, sot realizoi takim me Robert Scott Heizlet, drejtor i lartë i Institutit Nacional Demokratik për Çështje Ndërkombëtare (NDI) në vend, ku u diskutua për situatën aktuale politike dhe ekonomike, si dhe për qëllimet strategjike të shtetit.
“Mickoski e informoi Skot Hejzlet për nivelin e lartë të korrupsionit dhe krimit dhe keqpërdorimit të institucioneve nga qeveria e LSDM-së dhe Dimitar Kovaçevskit, duke theksuar se gjendja në vend po përkeqësohet për shkak se qeveria nuk po zbaton asnjë reformë dhe e gjithë kjo kontribuon edhe në prapambetjen dhe varfërimin e qytetarëve. Në të njëjtën kohë, dhe për këtë, ai theksoi se nevojiten zgjedhje të parakohshme parlamentare, të cilat do të sjellin ndryshime dhe ardhmëri për qytetarët”, njoftuan nga partia OBRM-PDUKM.
Nga partia theksuan se Mickoski edhe një herë e ka konfirmuar qëndrimin e OBRM-PDUKM-së se negociatat e Maqedonisë së Veriut për hyrje në Bashkimin Evropian duhet të zhvillohen në bazë të parimeve dhe vlerave evropiane, e jo në shantazh dhe diktim të autoriteteve bullgare.
“Mickoski u falënderua për bashkëpunimin dhe mbështetjen e deritanishme nga NDI, ndërsa bashkëbiseduesit konstatuan se ekziston mundësia për promovim të mëtutjeshëm”, shtuan nga OBRM-PDUKM.
