Siç njoftoi së fundmi ambasadori David Geer, Komisioni Evropian është duke vendosur një mision vlerësues në Maqedoninë e Veriut për t’u fokusuar në funksionimin e Këshillit Gjyqësor, shkruan TV21.
Një ekip ekspertësh nga shtetet anëtare të BE-së do të shqyrtojë kuadrin institucional të Këshillit Gjyqësor dhe do të propozojë masa afatshkurtra dhe afatmesme, duke përfshirë masa legjislative dhe institucionale, me qëllim forcimin e pavarësisë, paanshmërisë dhe besueshmërisë së këtij organi të rëndësishëm të menaxhimit në gjyqësor.
Udhëheqësi i ekipit, Branko Hrvatin, ish-kryetar i Gjykatës Supreme të Kroacisë, do të vizitojë Maqedoninë e Veriut më 27 dhe 28 korrik për të filluar misionin, duke identifikuar qëllimin e punës së ekipit.
Puna do të përfundojë me mbështetjen e një ekipi ekspertësh nga vendet anëtare të BE-së, të cilët do të vizitojnë Maqedoninë e Veriut në shtator të vitit 2023.
