Me qëllim për t’i informuar qytetarët lidhur me ndihmën juridike falas si dhe për të siguruar shfrytëzim dhe qasje më të mirë në këto shërbime, Ministri i Drejtësisë, Krenar Lloga sot mori pjesë në promovimin publik të kësaj ndihme në Gjevgjeli, thuhet në njoftimin e Ministrisë së Drejtësisë.
“Me Kryetarin e Komunës së Gjevgjelisë, Andon Saramandov, diskutuam për rolin e rëndësishëm të pushtetit vendor në arritjen e synimeve tona të përbashkëta, si bashkëpunimi në realizimin e ndihmës juridike falas dhe nevojat e komunës për mbështetje nga Ministria e Drejtësisë, me të vetmin qëllim shërbimin me sukses të qytetarëve, përmbushjen e nevojave të tyre dhe detyrimet tona.
Ndër të tjera, në takim, kryetari i komunës theksoi nevojën për fuqizimin e kapaciteteve të Administratës për Çështje Pronësore- Juridike në Gjevgjeli, e cila përballet me 5000 lëndë të pazgjidhura, si dhe mungesën e një gjeodezisti në Agjencinë e Kadastrës së Patundshmërive. Këto vështirësi paraqesin problem për realizimin e të drejtave të qytetarëve dhe sigurimin e shërbimeve të duhura për popullatën në Komunën e Gjevgjelisë.
Gjatë vizitave të sotme, qëndruam edhe në zyrën rajonale të Ministrisë së Drejtësisë dhe zyrën për ndihmë juridike falas në Gjevgjeli.
Ky aktivitet është pjesë e një sërë aktivitetesh për ngritjen e vetëdijes, të mbështetura nga Bashkimi Evropian dhe Këshilli i Evropës në bashkëpunim me Ministrinë e Drejtësisë, të cilat do të zhvillohen në rajone të ndryshme të vendit, me qëllim të nxitjes së përdorimit të ndihmës juridike falas, me vëmendje të veçantë në kategoritë e cenueshme”, thuhet në njoftimin e Ministrisë së Drejtësisë.
