Kryeministri Dimitar Kovaçevski, sot së bashku me Presidenten e Komisionit Evropian, Ursula von der Leyen, në kuadër të vizitës zyrtare në Republikën e Maqedonisë së Veriut, mbajtën konferencë për media, së cilës i parapriu takimi tet-a-tet mes Kovaçevskit dhe Von der Leyen dhe takim dypalësh i delegacionit të Qeverisë së Republikës së Maqedonisë së Veriut dhe delegacionit të Komisionit Evropian.
Pas takimit, Kovaçevski në fjalimin e tij tha se BE-ja është e ardhmja e vetme për Maqedoninë e Veriut. Ai gjithashtu tha se procesi i integrimit evropian është një proces që përbëhet nga dy rrugë, njëra është politike, por tjetra ekonomike.
“Me realizimin e tij, i cili varet edhe nga BE-ja, por mbi të gjitha nga ne, vendet e Ballkanit Perëndimorë do të dyfishojnë volumin e ekonomisë së rajonit dhe të vendit përmes rritjes së bashkëpunimit ekonomik. Me vendosjen dhe forcimin e tregut të krijuar rajonal, ekonomitë tona do të rriten me rreth 10%. Dhe me hapjen e dyerve për tregun e vetëm evropian, siç parashikon ky Plan, mundësitë janë vërtet të mëdha”.
“Po hapen mundësi shtesë për zhvillim dhe pjesëmarrje në proceset e transformimit të energjisë në Evropë. Ne aspirojmë të jemi një vend i pavarur nga energjia, me potencial të madh për investime në energjinë e ripërtërishme. Tashmë e kemi vendosur vendin në atë rrugë, po punojmë që të bëhemi qendra e energjisë së gjelbër të Evropës dhe tani do të kemi mundësinë të jemi palë aktive në tranzicionin energjetik të Evropës, duke qenë se tashmë po marrim pjesë në punën e komunitetit evropian të energjisë. Ne do të jemi në gjendje të mbështetemi vërtet te miqtë tanë evropianë për sa i përket energjisë, por edhe së bashku me të gjitha vendet e BE-së për të vendosur për të ardhmen energjetike të Evropës, pjesë e së cilës jemi edhe ne”, tha Kovaçevski.
Sa i përket anëtarësimit në BE deri në vitin 2030, ai tha se është qëllim ambicioz, por i arritshëm.
“Maqedonia e Veriut ka nevojë për integrim, jo izolim siç e pamë në të kaluarën. Rruga drejt BE-së nuk është e lehtë, por duhet marrë. Sepse në fund të asaj rruge është çmimi i madh, dhe ai është anëtarësimi i plotë në BE, anëtarësimi në Unionin e vendeve më të zhvilluara, më të pasura në të cilat mbizotëron prosperiteti ekonomik, drejtësia sociale dhe sundimi suprem i demokracisë dhe i së drejtës. Qytetarët tanë, gjeneratat e ardhshme do të jetojnë në BE, krenarë që janë maqedonas, me kokën lart, me gjuhën maqedonase, me identitet maqedonas, por ajo që është më e rëndësishmja, më të pasur dhe me standard më të mirë se sa e kanë tani”, tha Kovaçevski.
