Për shkak të reshjeve të mëdha të borës, rruga Gostivar – Strazhë është plotësisht e mbyllur për qarkullim nga ora 16:00, njofton Lidhja Auto-Moto e Maqedonisë.
Në segmentin Gradsko – Prilep, te qafa “Pletvar” dhe anasjelltas, ndalohet qarkullimi i automjeteve të rënda, si dhe drejt pikës kufitare “Deve Bair” me Bullgarinë.
Në drejtim të Strazhës pasditen e sotme një numër i madh i automjeteve kanë mbetur të bllokuara nga bora në rrugë, ndërsa probleme ka edhe me drejtimin Mavrovë – Dibër, si dhe në drejtim të Kodrës së Diellit, ku përdorimi i zinxhirëve është i detyrueshëm.
Vozitësit duhet t’i kushtojnë vëmendje të veçantë nëse lëvizin përgjatë rrugës rajonale për në Dibër përgjatë luginës së Radikës. Rruga është shumë e rrëshqitshme dhe mund të ketë rrëshqitje dheu. Pasditen e sotme një kamion cisternë ka rrëshqitur në rrugën Gostivar – Mavrovë.
