Edhe pse janë dy personazhe larg njëri-tjetrit si dita me natën, kundërshtia mes tyre e ka një argument.
Pak ditë më parë, Ermal Mamaqi, që tashmë është shndërruar edhe në një producent filmi, promovoi veprën e tij të dytë, "I love Tropoja". Filmi është në ditët e parë dhe nuk dihet nëse do të ketë suksesin e "Dy gisht mjaltë", ndonëse në terma financiarë e ka tejkaluar atë jo pak.
Por pse pikërisht "I love Tropoja"? pse ky titull? Dhe kuriozitetin na e shuan vetë producenti që në një intervistë do të shpjegonte se me këtë ai donte njëkohësisht të promovonte vlerat dhe bukuritë natyrore të zonës, por edhe të kundërshtonte Liam Neeson-in që në filmin e tij aq shumë të përfolur, "Marco from Tropoja" e pati përshkruar zonën me nota jo aq të pëlqyera për ne shqiptarët.