Islanda do të mbetet jashtë performancës live në “Eurovision”.
Pjesëmarrësi i Islandës në festivalin e këngës në Eurovision nuk do të performojë në shfaqjet e drejtpërdrejta të këtij viti pasi një anëtar i bendit doli pozitiv me COVID-19, shkruan BBC.
Daði og Gagnamagnið do të qëndrojë në garë, por nuk do të interpretojë drejtpërdrejt në provën e së mërkurës, gjysmëfinalen e së enjtes ose finalen të shtunën.
Në vend të kësaj do të përdoren pamjet e regjistruara gjatë një prove të fundit.
Këngëtari kryesor, Daði Freyr tha se testi pozitiv ishte një “befasi e madhe”.
“Ne jemi shumë të kënaqur me performancën (e regjistruar) dhe super të entuziazmuar për të gjithë që e shihni atë”, u shpreh ai.
Organizatorët e Eurovision thanë në një deklaratë: “Në bashkëpunim të ngushtë me EBU dhe transmetuesin nikoqir, Daði og Gagnamagnið kanë marrë vendimin e vështirë për t’u tërhequr nga shfaqja e drejtpërdrejtë të këtij viti në Eurovision.
“Ata duan vetëm të interpretojnë së bashku si një grup. Kënga e tyre do të mbetet në garë dhe ne do të transmetojmë performancën e tyre të provës, të regjistruar në skenë më 13 maj”, thuhet në njoftimin e organizatorëve të festivalit.
Një anëtar i ekipit të Islandës kishte rezultuar pozitiv në fundjavë, por të hënën, grupi tha se të gjitha testet ishin kthyer negative.
Ata të gjithë kanë qenë të izoluar në një hotel dhe duke bërë teste të rregullta gjatë javës.
