E fejuara e gazetarit të vrarë Jamal Khashoggi shkroi një letër të hapur të publikuar nga Washington Post duke i bërë thirrje Justin Bieber të anulonte koncertin e tij të ardhshëm në Arabinë Saudite.
"Kjo është arsyeja pse po ju shkruaj me një lutje: Anuloni performancën tuaj të 5 dhjetorit në Arabinë Saudite," shkroi Hatice Cengiz. "Kjo është një mundësi unike për t'i dërguar një mesazh të fuqishëm botës se emri dhe talenti juaj nuk do të përdoren për të rivendosur reputacionin e një regjimi që vret kritikët e tij."
Bieber do të performojë në Garën e Formula 1 të Arabisë Saudite në dhjetor, të cilit i janë bashkuar artistë si ASAP Rocky, David Guetta dhe Jason Derulo në Grand Prix inauguruese të Jeddah.
Cengiz i kërkoi Bieber-it të kujtonte se po performonte me një ftesë nga vetë Princi i Kurorës Saudite, Mohammed bin Salman.
"Asgjë e rëndësishme nuk ndodh në Arabinë Saudite pa pëlqimin e tij dhe sigurisht, jo një ngjarje kaq e rëndësishme si kjo," shkroi Cengiz. "Fytyra juaj është paraqitur edhe në faqen e internetit të ngjarjes bashkë me të tijën - xhelatin e të fejuarit tim, Jamal."
Në vitin 2018, një ekip agjentësh të qeverisë së mbretërisë vranë gazetarin në konsullatën saudite në Stamboll, ku ai do të merrte dokumentet për martesën e tij të ardhshme me Cengiz. Një raport i inteligjencës amerikane zbuloi se princi i kurorës miratoi operacionin, por Ministria e Jashtme saudite lëshoi një deklaratë duke thënë se "refuzon plotësisht vlerësimin negativ, të rremë dhe të papranueshëm në raportin që ka të bëjë me udhëheqjen e Mbretërisë".
Cengiz nuk është e vetmja që kritikon garën e F1.
"Organet sportive si Formula 1 dhe FIA nuk mund të injorojnë faktin se ata dhe tifozët po përdoren për larjen e sporteve," tha për The Guardian Minky Worden, drejtor i Human Rights Watch që mbikëqyr sportin.
Në vitin 2019, Nicki Minaj u tërhoq nga një koncert në Arabinë Saudite, duke thënë se dëshiron ta bëjë të qartë mbështetjen e saj për "të drejtat e grave, komunitetin LGBTQ dhe lirinë e shprehjes".
“Nëse refuzoni të jeni peng i MBS-së, mesazhi juaj do të jetë i zhurmshëm dhe i qartë: Unë nuk performoj për diktatorët”, ka shkruar Cengiz. “Unë zgjedh drejtësinë dhe lirinë mbi paratë”.
Justin Bieber ende nuk ka komentuar.
