Momenti kur Will Smith gjuajti Chris Rock ishte më i përfoluri nga nata e Oscars 2021. Me sa u tha, Chris guxoi me shakanë sepse nuk e dinte që Jada Pinkett Smith vuan nga alopecia. Megjithatë, prezantuesja e "Red Table Talk" është hapur për përvojën e saj me rënien e flokëve më parë dhe vitin 2018 konfirmoi se ishte diagnostikuar me alopeci.
Por çfarë është alopecia? Si mund të ndikojë te flokët dhe a ka ndonjë trajtim për të? Ja çfarë duhet të dini:
Fillimisht një përmbledhje se çfarë ka thënë Jada Pinkett Smith për alopecinë e saj.
Në një episod të "Red Table Talk" në 2018-ën, Pinkett Smith u tha shikuesve se ajo kishte probleme me rënien e flokëve dhe se ishte e tmerrshme kur e gjitha nisi.
“Isha në dush një ditë, pastaj pashë vetëm grushta flokësh në duart e mia dhe mendova: O Zot, a po bëhem tullace?” tha ajo. “Ishte një nga ato momentet e jetës sime kur unë po dridhesha vërtet nga frika.”
Në atë kohë, ajo tha se kishte bërë çdo lloj testi dhe nuk ishte e sigurt se pse po i humbiste flokët.
Që atëherë, Jada ka vazhduar të diskutojë për gjendjen. Ajo ndau një video në Instagram vitin e kaluar ku shfaqej në flokët e qethur, duke shkruar: "Unë dhe kjo alopecia do të bëhemi mikesha".
Çfarë është alopecia?
Alopecia është një term mjekësor për rënien e flokëve, i cili mund të përfshijë gjithçka, nga rënia e zakonshme e flokëve deri te humbja e qimeve në trup, sipas klinikës Mayo.
Ka shumë lloje të alopecisë, duke përfshirë alopecia areata, një sëmundje në të cilën sistemi imunitar sulmon folikulat e flokëve, duke shkaktuar rënie të flokëve.
Sipas Institutit Kombëtar të Shëndetit, alopecia areata me njolla shkakton rënie të flokëve në pjesë të madhësisë së monedhës, ndërsa alopecia totalis bën që njerëzit të humbasin të gjithë ose pothuajse të gjithë flokët. Njerëzit me alopecia universalis humbasin të gjitha ose pothuajse të gjitha qimet në lëkurën e kokës dhe pjesën tjetër të trupit.
Çfarë e shkakton alopecinë?
Shumë faktorë mund të shkaktojnë rënien e flokëve, duke përfshirë historinë gjenetike, ndryshimet hormonale dhe gjendjet mjekësore si alopecia areata, sipas klinikës Mayo.
Humbja e flokëve mund të ndodhë edhe pas marrjes së medikamenteve dhe suplementeve të caktuara. Disa modele flokësh dhe trajtime që tërheqin flokët mund të shkaktojnë një gjendje të quajtur alopecia tërheqëse (traction alopecia).
Ndërsa të gjithë njerëzit mund të përjetojnë rënie të flokëve, një studim i vitit 2018 zbuloi se gratë me ngjyrë dhe hispanike në SHBA kanë një rrezik më të lartë të alopecia areata, krahasuar me gratë e bardha johispanike.
A mund të shkaktojë stresi alopeci?
Njerëzit mund të përjetojnë rrallimin e flokëve disa muaj pas një "shoku fizik ose emocional", sipas klinikës Mayo. Klinika e Cleveland vuri në dukje se shumë njerëz që përjetojnë fillimin e alopecisë areata kanë pasur burime stresi të kohëve të fundit, megjithëse lidhja nuk është vërtetuar. Stresi emocional mund të sjellë alopeci te njerëzit në rrezik për këtë gjendje, raportoi The Wall Street Journal.
Mjekët thanë për The New York Times se pacientët që shërohen nga COVID-19 kanë raportuar rënie të flokëve, e cila nuk është një simptomë e virusit, por një simptomë e stresit nga rikuperimi. Të tjerë që nuk rezultuan kurrë pozitivë për koronavirus raportuan gjithashtu humbjen e flokëve nga faktorë stresues si vdekja e një anëtari të familjes, humbja e punës etj., megjithëse mund të mos diagnostikohen me një formë specifike të alopecisë.
A shkakton alopecia rënie të përhershme të flokëve?
Mundet, por shumë njerëz me sëmundje të lidhura me alopecinë shohin që flokët e tyre rriten sërish. Ndryshimet hormonale, të tilla si ato gjatë shtatzënisë ose menopauzës, si dhe kushtet mjekësore mund të shkaktojnë humbje të përhershme dhe të përkohshme të flokëve, sipas Klinikës Mayo.
Te njerëzit me alopecia areata, flokët shpesh rriten vetë tek ata me humbje më të rrallë të flokëve, tek ata që u diagnostikuan me alopeci në një moshë të vonshme dhe tek ata pa histori familjare të sëmundjes.
Si trajtohet alopecia?
Trajtimet për lloje të ndryshme të alopecisë mund të përfshijnë ilaçe që ndihmojnë në rritjen e flokëve, transplantin e flokëve etj. Kur trajton alopecia areata, një person mund të përdorë injeksione kortikosteroide, sipas Johns Hopkins Medicine. Trajtimi për lloje të ndryshme të alopecisë varet nga shkaku themelor i rënies së flokëve, por shumica e formave të saj nuk kanë kurë.
