Princi Harry tregoi se terapia e ndihmoi atë të kuptonte se ai ka fuqinë të zgjedhë se si ta jetojë jetën e tij, pas largimit nga familja mbretërore.
"Në momentin kur fillova të bëj terapi, më hapi sytë," tha ai gjatë një bisede në samitin inaugurues Masters of Scale të mërkurën. “Po ecja në jetë duke menduar se kishte vetëm një mënyrë për të jetuar. Dhe terapia e shpërtheu atë flluskë. Më pas, kur gjeta rrugën time drejt trajnimit, flluska tjetër shpërtheu dhe krejt papritur kuptova se tani kam perspektivë dhe një kuptim të madh të vlerës sime. Rifitova besimin që nuk e kisha menduar kurrë se e kisha.”
Duka i Sussex-it thuhet gjithashtu se nuk kishte dëgjuar për terapinë ose trajnimin ndërsa rritej në familjen mbretërore ose shërbente në ushtri.
“Princi Harry thotë se duke u rritur në familjen mbretërore dhe më pas duke kaluar 10 vjet në ushtri, ai kurrë nuk i dëgjoi fjalët ‘terapi’ ose ‘trajnim”, shkroi në Twitter Doron Weber, zëvendës president dhe drejtor programi i Fondacionit Alfred P. Sloan, duke shtuar: “Më pas jeta e tij ndryshoi”.
Harry-t, i cili është shefi i ndikimit të BetterUp që ofron trajnime profesionale virtuale, iu bashkua CEO i BetterUp, Alexi Robichaux, i cili gjithashtu diskutoi rëndësinë e trajnimit.
Harry dhe gruaja e tij, Meghan Markle, kanë qenë gjithmonë shumë të hapur për rëndësinë e shëndetit mendor. Në vitin 2017, ai tregoi se sa shumë ndikoi vdekja e nënës së tij, Princeshës Diana, tek ai dhe mbyllja e tij në vetvete.
Dhe Markle zbuloi në vitin 2021 se kishte pasur mendime vetëvrasëse pasi iu bashkua familjes mbretërore, duke shtuar se Buckingham Palace nuk bëri asgjë kur ajo kërkoi ndihmë.
