Hilary Duff reagoi për vdekjen e ish-it të saj Aaron Carter, i cili u gjet i vdekur dje, më 5 nëntor.
Aktorja ndau në Instagram një shënim të përzemërt.
"Për Aaron - Më vjen thellësisht keq që jeta ishte kaq e vështirë për ty dhe që u desh të luftoje para gjithë botës. Ti kishe një sharm që ishte absolutisht i zjarrtë... djali që e bëri veten time adoleshente ta donte thellësisht. I dërgoj dashuri familjes tënde në këtë kohë. Pusho i qetë," -shkroi Duff.
Fansat e vlerësuan dedikimin prekës të Duff.
Ajo dhe Carter ishin takuar kur të dy ishin 13 vjeç. Të dy ishin në një lidhje me ulje-ngritje, derisa u ndanë në vitin 2003.
Duff më vonë u martua me Mike Comrie në vitin 2010, por ata u ndanë dhe tani ajo është e martuar me Matthew Koma.
“Jam vërtet i lumtur për të që është në një lidhje të suksesshme dhe se do të ketë një fëmijë”, tha Carter në vitin 2012. “Ndonjëherë mendoj me vete, ndoshta mund të kisha qenë unë, por është kështu siç është.”
Dy vjet më vonë, ai deklaroi dashurinë e tij për yllin e Disney Channel.
"Unë do ta kaloj pjesën tjetër të jetës sime duke u përpjekur të përmirësoj veten për t'u kthyer tek ajo. Nuk më intereson se çfarë mendon ndonjë nga ju”, tha këngëtari.
Carter, i cili ka djalin Prince me ish-in e tij Melanie Martin, u gjet i vdekur në shtëpinë e tij në Kaliforni.
