Këngëtarja shqiptare, Dhurata Dora ka gati një tjetër projekt muzikor, që këtë herë do të jetë bashkëpunim.
Në një postim në llogarinë e saj në Instagram, ku numëron mbi 2.7 milionë ndjekës, këngëtarja ka njoftuar se po vjen me një bashkëpunim të ri me artistin nga Austria, Raf Camora.
Autorja e “Besame”, zbuloi se kënga mban titullin “Palma” dhe pritet të publikohet më 27 korrik.
“X Raf Camora-Palma/27.07/23:59”, ka shkruar Dhurata në mbishkrimin e fotove të shkëputura nga xhirimet e videoklipit.
Kujtojmë që artisti austriak njihet për bashkëpunimet me reperët shqiptarë si Azet dhe Noizy, ndërsa ky do të jetë i pari me Dhuratën.
Ndërkohë, këngëtarja aktualisht po shijon suksesin e këngës solo që solli pak ditë më parë “Pa mu”.
