Një udhëtim njëzet e dy vjeçar. Në albumin e saj të ri, This is me… Now, J.LO na sjell gëzime, dhimbje, pengesa, plagë, triumfe. Por sot si atëherë në 'This is me…Then', përkrah saj është edhe Ben Affleck. Burri me të cilin ylli i popit duhej të martohej në vitin 2004, por gjithçka u rrëzua disa ditë para dasmës. Burrin që ajo e rigjeti përsëri në 2021 dhe u martua - më në fund - në 2022. “Unë e dija në zemrën time se doja të isha me të për pjesën tjetër të jetës sime”, tha J.Lo për Apple Music. "Por, dukej sikur nuk do t'ia dilnim."
Artistja e lindur në vitin '69, foli pëe martesën e anuluar. “Ne nuk u ndamë në atë moment, ndodhi gjatë muajve në vijim. Por ai episod hodhi dyshime tek ne të dy për marrëdhënien tonë, se ku po shkonte. Dhe u tremba. Ishte një kohë shumë e trishtuar, duke lënë të lirë dikë që e do vërtet. Arsyeja? Ne thjesht nuk ishim mjaftueshëm të pjekur në këtë kuptim,” theksoi Jennifer në përgjigje të pyetjeve të Zane Lowe. "Ne nuk kishim aftësinë për ta kuptuar situatën emocionalisht."
Prandaj, mosha dhe mungesa e përvojës mund të kenë luajtur një rol kyç. “Edhe pse ai ishte gati tek të tridhjetat, dhe unë isha pak më e madhe, ne nuk ishim gati të shikonim njëri-tjetrin dhe të punonim pak për atë që kishim, që ishte e vërtetë. Dhe kështu bëmë atë që bëjnë shumë njerëz, të cilët ndahen kur gjërat vështirësohen, duke i ndarë rrugët. Kështu bëmë: gjetëm njerëz të tjerë, u bëmë me fëmijë të bukur”, tha ajo. "Pastaj erdhi një pikë ku kuptova se isha mirë vetëm."
Dhe pikërisht këtu Beni iu kthye jetës së saj. “Është për të qeshur që edhe ai eci pak a shumë në të njëjtën rrugë”. Tani ata kanë një familje të madhe të shkëlqyer, me binjakët e J.Lo, Eme dhe Max, dhe tre fëmijët e Affleck, Violet, Seraphina dhe Violet: "Ne jemi dy prindër që i kushtojmë shumë kohë punës që duan, por ata janë qendra e universit tonë. Ata u rritën, që në moshë të vogël, në sy të publikut, patën një edukim disi surreal. Por ata janë të gjithë tepër të zgjuar dhe të shkëlqyeshëm. Ne i duam ata”.
Të gjithë pyesnin veten pse të dy, të cilët u fejuan në vitin 2002 dhe u ndanë në fillim të vitit 2004 në prag të martesës, kishin pritur tetëmbëdhjetë vjet para se të ribashkoheshin. Një pyetje që J.Lo sapo iu përgjigj. Diva shpjegoi: "Mu deshën pothuajse dy dekada për të kuptuar veten përpara se universi të hapej dhe të më lejonte të ribashkohesha me dashurinë e jetës sime. Për disa arsye, përpara se të gjenim njëri-tjetrin, Beni dhe unë duhej të rriteshim, të bënim gjëra të tjera."
Ata kanë bërë shumë "gjëra të tjera" në tetëmbëdhjetë vjet. Pasi i tha lamtumirë Benit, ajo u martua me Marc Anthony, babanë e binjakëve të saj, dhe më pas pati një lidhje me Alex Rodriguez që përfundoi një hap larg dasmës (për shkak të tradhtive të tij). Ndërkohë Affleck u martua me Jennifer Garner, pati tre fëmijë, u divorcua dhe pati një lidhje me Ana De Armas. “Kur u kthyem bashkë, nuk mund ta besoja dhe as ai nuk mund ta besonte. Sepse asnjëri prej nesh nuk e kishte planifikuar ribashkimin. Ne vërtet kishim vazhduar jetën tonë, por sapo u afruam përsëri gjithçka ndodhi në një çast".
Dhe sot ata të dy janë më të dashuruar se kurrë, siç u pa edhe në daljen e fundit të çiftit në tapetin e kuq. Ylli i popit ia kushtoi albumin e ri bashkëshortit të saj dhe në veçanti këngën e titulluar 'Not going anywhere': "Kur Beni dhe unë u takuam përsëri pas 18 vitesh, ai filloi të dërgonte çdo mesazh me këto tre fjalë, të ndara me një pikë. Ai donte të më qetësonte se jo, nuk do të shkonte askund. Ishte thelbësore ta dëgjoja fillimisht të përsëritej dhe më pas ta besoja dhe kështu fillova t'i përdor edhe unë."
