Kunata e Teuta Rugovës, stilistja Blerina Kllokoqi-Rugova, bashkëshortja e djalit të presidentit historik, Ibrahim Rugova, ka reaguar lidhur me deklaratën e Murat Bashës, ish-këshilltari i Oborrit Mbretëror.
Basha deklaroi së fundmi se kanë ekzistuar plane për të gjetur një partnere për Princ Lekën, kur Presidenti Rugova ishte gjallë, dhe Teuta qe menduar si një kandidate e mundshme.
Murat Basha, në emisionin “Top Story”, tha se sipas traditave dhe rregullores së Mbretërisë Shqiptare, u konsiderua si e arsyeshme që Princ Leka të martohej me Teutën.
Ai shpjegoi se nga rrethi i ngushtë i Mbretit Leka, u krijua një ‘projekt’ që synonte të planifikonte një të ardhme për princin me një vajzë shqiptare, por që nuk jetonte në Shqipëri, dhe Teuta dukej si një zgjedhje e përsosur.
Megjithatë, pasi mësuan se Princi Leka ishte në një marrëdhënie, kjo ide nuk u materializua. “Atë kohë çdo gjë u prish dhe unë e kam përgëzuar Princin Leka se ndoqi zemrën e tij”, rrëfeu Basha.
Në një intervistë për emisionin “Gjesi”, Blerina Kllokoqi-Rugova u shpreh se ishte hera e parë që dëgjonte për këtë çështje dhe është e habitur nga kjo ide. Sipas saj, Teuta ishte shumë e re në atë kohë që po flitet për këtë propozim. “Nuk kam dëgjuar kurrë për këtë lajm. Teuta ka qenë shumë e re atëherë, por Teutën të gjithë e duan,” tha Blerina. Kështu, ngjarja që rrethohet nga njëfarë mistere, shton një dimension tjetër në historinë e pasur të Oborrit Mbretëror dhe të familjes Rugova.
