Sjelljet tekanjoze dhe të pa matura të Qeverisë së Kosovës dhe SBASH-ut i mbajnë në shtëpi nxënësit në Kosovë. Konstatimet për paga të vogla apo të mjaftueshme dhe për meritat e mësimdhënësve nuk ndryshojnë asgjë në humbjet që po prodhojnë këto dy kryesi ardhmërisë së vendit.
Në vend të veprimeve konkrete dhe mobilizimit të përbashkët për të përmirësuar gjendje e arritshmërisë e cila është shumë e ulët, konstatuar nga testi PISSA dhe testet tjera, këto kryesi debatojnë, konstatojnë dhe nuk pajtohen në mes veti ; kurse shkollat mbesin të mbyllura, nxënësit në shtëpi mësimdhënësit të heshtur dhe të deprimuar në sallatë e arsimtarëve. Disa nga këta vazhdojnë kurset me pagë për lëndë të ndryshme.
Bazuar në debate dhe deklarime këtë situatë shumë të dëmshme dhe alarmante nuk e konsiderojnë kështu vendimmarrësit. Pezullimi i përkohshëm i ligjit dhe vazhdimi i bisedave deri në një marrëveshje të mirë për arsimin në Kosove nuk do të lëndonte sedrën e plagosur të asnjërës palë. Rishikimi i pagave të Qeverisë, Kuvendit dhe hartimi i koeficientit të pranueshëm për të gjithë ata që paguhen nga Buxheti i Kosovës është rruga e vetme. Ky buxhet buron nga taksapaguesit,kurse këto dy kryesi , këtyre të fundit ua kanë lenë nxënësit pa shkolla. Në vend të ndihmës së këtyre dy kryesive për të gjetur rrugën e duhur të cilën, vet nuk po arrijnë ndërsa të tjerët ose i fërkojnë duart nga gëzimi i çuditshëm dhe i turpshëm ose nxitin struktura tjera që Kosova të shkojë në një grevë totale. Kjo e tëra po ndodhë kur Kosova po “përgatitet” për një dialog final me fqinjin ton armik të përbetuar. Kjo gjendje të sjellë para dilemave, a meriton Kosova dhe populli i Kosovës diçka të tillë?
A meriton Kosova dhe populli i saj një udhëheqje të tillë?
A janë këta më të mençurit tonë?
A i zgjodhëm ne apo nuk jemi të aftë të i përcjellim kombinatorikat politike për gatimin e të cilave kanë fut duart në magjen ton dreqi dhe i biri i dreqit.
Jo këtë nuk e meriton ky popull i mirë.
Jo, jo këtë nuk e meritojnë këta nxënës të bukur, shëndetshëm dhe me aftësi të lartë për nxënie.
Greva në arsim nuk prezanton aftësinë dhe zgjuarsinë e shqiptarëve të Kosovës. Kjo prezanton modestinë e tyre pa kuptim, krenarinë individuale të tepruar deri në krekosje, e që të dyja së bashku po prodhojnë hezitim dhe inat.
Kurse rezultati i rrezikshëm në progresion prodhon humbje gjithëpërfshirëse, vrasje të shpresës, demoralizim dhe dëshirë për ikje nga Liria pa e kthyer kokën prapa. Kjo është strategji e rrezikshme për ndjekjen e gjeneratave te reja nga Kosova.
A duhet të i lejohet kujt ky luks? Apo duhet të analizohet me krahasim; dëmi që na sjell armiku me luftë speciale, apo të armatosur dhe klika e shtetit tonë pa luftë. Këtë dhembje nuk e ndjejnë ata që nuk kuptojnë humbjen. Kjo është për dhembje edhe sikur të kishte ndodhur diku në botë.
Heshtja intelektuale në Kosovë është e rrezikshme. Kjo heshtje është ogur i zi për ardhmërinë tonë, është një lloj abstenimi për të luftuar të keqen që do të thotë për të jetuar të lirë.