Mosareagimi, indiferenca publike dhe paralizimi i shoqërisë civile, hipokrizia politike e opozitës dhe heshtja mediatike ndaj taksës korruptive qeveritaro-private së Rrugës së Kombit “justifikon” edhe meritën që ka shoqëria shqiptare për tu pajtuar me gjithçka çfarë bën e vepron pushteti dhe interesi i korruptuar i pushtetit dhe i pushtetarëve. Kjo përderisa nuk pati reagim masiv dhe as solidaritet human kombetar e shoqëror proteste kundër kësaj takse të lartë dhe antikombëtare e cila është një gjobë për shqiptarët, sidomos apo më sakt këta taksë qeveria e vendosi apostafat për t’i zhvatur shqiptarët e Kosovës të cilët vizitojnë shumë herë në vit Shqipërinë.
Komuniteti i cili nuk i kushton vëmëndjen e duhur dhe nuk i përkushtohet interesit patriotik, publik dhe atij kombëtar mos ta gënjejë veten se do të arrijë rehatinë, qetësinë, sigurinë dhe mirëqënien personale, as atë familjare dhe as qetësinë shpirtërore, as lirinë politike dhe as dlirësinë morale e humane.
Kur thuhet dhe emërtohet një Rrugë me emër të tillë të madh si “Rruga e Kombit”kjo nuk bëhet për ta mitizuar qeverinë apo politikën që e mori nismën për ndërtimin e saj si nje vepër që për nga rëndësia politike, ekonomike e strategjike mori jehonë gjithkombëtare. Kjo rrugë jo vetëm se duhet t’i shërbejë popullit dhe kombit dhe ajo vazhdon të ndërtohet (pasi nuk ka përfunduar) me paratë e popullit.
Pra, kjo rrugë i shërben Kombit sepse edhe Shqipëria e Kosova janë dhe i përkasin Kombit shqiptar.
Pra, Rruga është pronë kombëtare dhe as politike, as partiake e as private.
Dhe kjo Rrugë nuk duhet t’i jipej me koncension asnjë privati i cili nuk ka shpenzuar dhe as nuk ka investuar asnjë lek për ndertimin e saj.
Por kur një rruge të tillë strategjike kombëtare dhe me emërtesë autoritative patriotike , kur ajo tatohet kaq shumë shtrenjtë për të mbushur gropën e korrupsionit qeveritar , si dhe për faktin se kjo rrugë nuk ofron shërbimin e duhur e që nuk ka përfunduar, dhe për të cilën duhet të paguajnë një çmim shumë të lartë kryesisht pjesa kombëtare shqiptare që është në Kosovë dhe në Kosovë Lindore, kjo më nuk është rruga e kombit, por e zhvatjes dhe e grabitjes së asaj pjese të kombit e cila ka meritën më të madhe kombëtare shqiptare për sakrificat, vuajtjet dhe kontributin e Pavarësisë së Shtetit Shqiptar të Shqipërisë .
Dhe për këto “arsye” politika e pushteti shqiptar i Shqipërisë për “integrimin gjithkombëtar” dhe për respekt e “mirënjohje “ua shpërblen me grabitje e zhvatje financiare kosovarëve që vijnë dhe e vizitojnë shtetin “Amë”, Shqipërinë.
Kjo vendimmarrje qeveritare duhet rishikuar edhe njeherë pasi është një ndërmarrje e veprim antikombëtarë , pasi qeveria shqiptare nuk bëri madje asnjë konsultë paraprake as me Shtetin Shqiptar të Kosovës.
Ky vendim qeveritar taksimi, i cili edhe u kundërshtua fillimisht me proteste popullore, edhe nga biznesi, megjithse shume zbehte nga nje pjesë të politikës dhe ndonji medie e që shkaktoi pakënaqësi, mospajtim e refuzim dëshpërimi të madh te njerezit të cilët janë të detyruar për të udhëtuar në ata rrugë edhe për faktin se nuk ka alternativë tjetër kalimi për të ardhur banorët e Veriut të Shqipërisë në Tiranë dhe shqiptarët nga Kosova e Lugina e Preshevës për në Shqipëri.
Qeveria aktuale e Shqipërisë bën vetëm dukje e reklama simbolike të takimeve të qeverisë së Shqipërisë me atë të Kosovës por nuk bën asgjë reale e konkrete për integrimin ekonomik, doganor e strategjik mes dy shteteve shqiptare.
Por përkundrazi, tani vendos edhe një kufi tjetër si pengesë shtesë pa konsultim paraprak me Kosovën, gjë e cila ia nxjerr në shesh hipokrizinë patriotike Qeverisë së Tiranës.
Më shumë Qeveria e Tiranës është e interesuar për integrimin e Ballkanit Perendimor se sa për integrimin Shqipëri-Kosovë.
Shqipëria përkrah krijimin e një Tregu të Përbashkët të Ballkanit Perendimor ku më e favorizuara dhe kryesore e lider në këtë treg do të ishte Serbia e cila jo vetëm se nuk e ka njohur Kosovën por vazhdon me të gjitha kapacitetet e saj politike e diplomatike që të pengojë njohjet ndërkombëetare për Kosovën.
Kjo taksë më e fundit për Rrugën e Kombit është në vazhdën e pengesave korruptive dhe të monopoleve pranë qeveritarëve shqiptarë të cilët pengojnë krijimin e Tregut të Përbashkët Ekonomik shqiptaro-shqiptar, Shqipëri-Kosovë.
Pra,si edhe ta kuptojmë pushtetin dhe Qeverinë e Shqipërisë sot, kur Kosova ballafaqohet me një problem të madh me rëndësi gjithëkombëtare, me problemin e kufirit me Serbinë dhe me atë të Kosovës Lindore, problem i cili është bërë edhe si një agjendë europiane dhe më gjërë , e ndërsa Shqipëria si gjithnjë “indiferente” por madje edhe perkundër kësaj ajo gjen “preokupimin” dhe kohën duke vendosur një taksë ndarjeje Shqipëri-Kosovë që njihet tashmë si Taksa e “Rrugës së Kombit”?!
Greqia përkujdeset aq shumë për minoritarët grekë në Shqipëri sa që edhe ku ka tre minoritarë ajo e ka detyruar Tiranën të hapë shkolla greke; ia ka imponuar Shtetit shqiptar lejen për të ndërtimin edhe të varrezave “memoriale” të ushtarëve pushtues grekë në trojet shqiptare në Shqipërië e Jugut; bën presion që edhe nga Historia e Shqipërisë të hiqet Çamëria, kur edhe jo vetëm se e ka marrë Çamërinë por tani pas 100 e ca vitesh Shqipëria shtet , Greqia po i merr Shqipërisë edhe sipërfaqe ujore detare bashkë me rezervat e saj me nafte e gaz; gjithashtu Greqia u akordon edhe ndihma finanaciare, paga dhe pensione minoritarëve grek në Shqipëri.
Ndërsa Shqipëria as minimalisht nuk interesohet as për t’u dërguar abetare për nxënësit e qindra mijra emigrantëve ekonomikë të cilët kanë emigruar dhe që jetojnë e punojnë në Greqi. Politika e pushteti politik në Tiranë gjithmonë justifikohet se “ jemi të varfër dhe nuk kemi mundësi financiare as për arsimin, as për shëndetsinë, as për ndihmë modeste sociale e as për pensione”.
Por pyesim politikën dhe pushtetarët shqiptarë se: a nuk jeni ju fajtorët dhe përgjegjësit për këtë gjëndje të rëndë ku e keni katandisur shtetin; a nuk jeni ju hajdutët që vidhni dhe abuzoni me paranë publike dhe që e keni zhytur shtetin dhe shoqërinë në varfëri, papunësi, mjerim e skamje, në korrupsion dhe në eksod?!
Ju politikanë e pushtetarë dështakë mendoni vetëm se si t’i merrni frymën qytetarëve shqiptarë të cilët kanë rrogat më të ulta në Europë, i ngarkoni shqiptarët me taksa e tatime sa që edhe ajrin po të keni mundësi do ta tarifonit e taksonit, pasi shtetin e keni nxjerrë në ankand me politikën “Shqipëria një euro”, dhe sot me politikën e dhënieve me koncesione të të gjithave që janë publike dhe shtetërore dhe me rëndësi kombëtare jetike e strategjike siç është edhe rasti i taksës së “Rrugës së Kombit?
Serbia me gjithë gjëndjen dhe krizëm që e ka mbërthyer atë, ajo u jep mbi 40 mijë rroga familjeve serbe të Kosovës, dhe megjithë gjëndjen jo të mirë as politike, as financiare dhe as ekonomike: dhe pavarësisht kësaj, Serbia investon qindra miliona euro për zhvillimin e komunave me shumicë popullsie serbe në Kosovë, pra i ndihmon ata.
Ndërsa Shqipëria jo vetëm se nuk e ndihmon Kosovën si shtet i ri i cili doli nga lufta e rrënuar , e djegur dhe e shkatërruar , e prapambetur dhe e pazhvilluar si pasojë e regjimit kolonialist genocidist serb, por përkundrazi sot Tirana i vë pengesa, vendos atë që tashmë quhet me të drejtë gjoba e madhe për qytetarët dhe për biznesin kosovar, taksimi shume i lartë për ata shqiptarë të cilët disa here në vit vizitojnë Shqipërinë, dhe vinë shpeshherë të pushojnë në Shqipëri.
Po kështu politika e Tiranës kundërshton edhe Bashkimin e Kosovës Lindore me Kosovën edhe përkundër faktit se ajo nuk ka bërë asgjë për shqiptarët atje , asnjë mbrojtje për liritë dhe të drejtat kombëtare të tyre, dhe asnjë ndihmë e jo më investim për komunat shqiptare të Luginës së Preshevës, dhe me këtë taksën e lartë të Rrugës së së Kombit Tirana i gjobit,zhvat dhe grabit edhe ata kur vijnë si dhe shqiptarët nga Maqedonia që udhëtojnë në Shqipëri në këtë rrugë.
Pra, taksa e Rrugës që është një taksë shumë e lartë dhe aq më tepër e imponueshme për tu paguar ajo edhe nga ata të cilët nuk e përballojnë dot, kjo pasi nuk ka alternativë tjetër dytësore për të udhëtuar , e cila është edhe si tarifë për tu paguar për një rrugë të papërfunduar, një taksim i lartë si një gjobë për të gjithë shqiptarët sidomos dhe veçanërisht për Shqiptarët e Kosovës dhe të Luginës së Preshevës.
A kjo është ajo se çfarë Shqipëria duhet të bëjë për “integrimin” gjithkombëtar të shqiptarëve!?
Pra, në çfarë roli e kontributi mund t’i besohet që mund të luajë si qeveria por edhe opozita në Shqipëri të cilat nuk lobojnë dhe as nuk ndihmojnë financiarisht kurrë jo se jo ,por as politikisht e diplomatikisht seriozisht për njohjet ndërkombëtare për Kosovën; për normalizimin e marrëdhënieve Kosovë-Serbi; për integrimin e serbëve të Kosovës Veriore në Shtetin e Pavarur të Kosovës, dhe as për liritë dhe të drejtat kombëtare apo edhe për Bashkimin e Luginës së Preshevës me Kosovën kjo si e drejtë kombëtare e tyre e deklaruar erdhe me Referendum , por që politika pozitë-opozitë në Shqipëri është kundër saj?!
“PatriotizmI “ politik djathtist PD-ist, kundërshtimi dikur “antikorrupsion” majtist politik PS-ist për ndërtimin e Rrugës së Kombit, buja dhe zhurma e madhe për dhe kundra ndërtimit të “Rrugës së Kombit” e cila ka një emërtesë patriotike dhe kombëtare, por në të vërtetë me këtë rrugë u spekullua shumë, u vodh dhe u abuzua shumë rreth 200-230 milion euro.
Një Rrugë që kushtoi shumë shtrenjtë e që nuk ka përfunduar akoma dhe as që nuk dihet se kur do të përfundojë, Rrugë e cila nuk ofron shërbimin e duhur dhe nuk plotëson as standartet.
Kjo Rrugë që u ndërtua për dhe në emër të Kombit, që reklamohej më shumë si sukses patriotik dhe si Rrugë politike e Berishës dhe e Partisë Demokratike , e qeverisë së Partisë Demokratike por e ndërtuar jo me paratë e tyre por me paranë publike, me paratë e taksapaguesve shqiptarë, por që edhe u vodh dhe u abuzua aq shumë me të.
Me ardhjen në pushtet të Partisë Socialiste nuk është ndërtuar as edhe një kilometër e kësaj Rruge.
Tashmë Partia Socialiste, qeverisja e saj duke mos gjetur e siguruar para për ndërtimin e kësaj Rruge , pas “vuajtjesh e mundimesh” , “përkushtimi” e “shqetësimesh” të mëdha për të gjetur para e fonde për “Rrugën e Kombit”, që prej një viti më në fund shpiku dhe gjeti zgjidhjen, jo si ishpushteti i mëparshëm i cili e ropi dhe e vodhi popullin shqiptar, paranë publike për këtë rrugë, por Partia dhe qeverisja socialiste tashmë ka vendosur tarifën apo taksën e lartë për shqiptarët e Kosovës të cilët duhet të paguajnë për “mirëmbajtjen” e kësaj Rruge. Kjo taksë realisht është një gjobë që u vihet qytetarëvë të Kosovës të cilët vijnë dhe e vizitojnë Shqipërinë, madje duhet për të paguar për një shërbim që kjo rrugë nuk u ofron atyre, sepse kjo rrugë as nuk plotëson standartet dhe as nuk ka përfunduar , por edhe që është një taksë shumë, shumë e lartë.
Ky provokim dhe ky antikosovarizëm i Qeverisë shqiptare mund të marrë me të drejtë edhe një si kundërpërgjigje reciprociteti nga Kosova e cila edhe ajo pse të mos vendosë taksë për Rrugën, për autostradën e saj edhe për qytetarët e Shqipërisë dhe për bizneset nga Shqipëria që operojnë në Kosovë, veprim ky që i imponohet Kosovës nga Tirana dhe që provokon dhe nxit një distancim çintegrues dhe largesë kombëtare mes dy shteteve shqiptare.
Kjo taksë e Qeverisë “Rama” është trau i ri ndarjes politike, tregëtare dhe ekonomike të Kombit , mes Shqipërisë dhe Kosovës, si trau i korrupsionit dhe si barrierë e pengesë për komunikimin, afrimin dhe bashkimin e Kombit.
Pyesim se përse hesht edhe opozita dhe pse ajo mjaftohet me një kundërshtim të cekët e vetem sa për dukje, përse opozita “patriotike” e PD nuk kundërshton dhe nuk deklarohet se kur të vijë në pushtet do ta rishikojë apo edhe do ta heq “Gjobën e Kombit” për “Rrugën e Kombit”.
Apo u arrit ujdija, marrëveshja e konsensusi politik, korruptiv e antikombëtar i politikës opozitë- pozitë së Tiranës që:” mos na hetoni ne për vjedhjen që kemi bërë me paratë e “Rrugës së Kombit” në emër të Kombit, dhe tani vazhdoni ju që të gjobisni e të grabisni qytetarët dhe shqiptarët e Kosovës me tarifën , taksën apo me gjobën e Rrugës me emër të Kombit ”.
Nuk e kuptoj pse hesht shoqëria civile si në Shqipëri dhe ajo në Kosovë, pse ato nuk kundërshtojnë këtë taksë si dhe veprime të tjera korruptive, padrejtësie dhe antipublike të politikës e të pushtetit.
A është organizuar shoqëria civile shqiptare mbi baza vullnetare në emër të lirive e të të drejtave qytetare apo janë organizime politike, servile e puthadore të pushtetit?!
A funksionojnë organizimet civile shqiptare mbi baza vullnetare në mbrojtje të interesave të qytetarit, interesit publike, social etj., dhe a janë ato të motivuara patriotikisht, moralisht, dhe a kanë frymë humaniteti e solidariteti nderqytetar apo janë edhe ato prona dhe leva te drejtuesve të tyre dhe të politikes e të interesave materialiste personale ashtu sikurse janë edhe mediat?!