Rritja e rasteve me rrezikshmëri për vendin, po shqetëson qytetarët, ndërsa ekspertët tërheqin vërejtjen për rritje të vigjilencës së sigurisë.
Të enjten, me 23 dhjetor, ndodhi një kërcënim për sulm terrorist me bombë në Stacionin e Autobuësve në Prishtinë. Policia u detyrua t’i evakuojë udhëtarët nga aty, duke e mbajtur për disa orë të bllokuar stacionin.
Pas kontrollimit të hapësirës njësitet kompetente kundër minave, nga rezultoi se nuk kishte rrezik, por ishte një kërcënim i rrejshëm.
“Njësitet policore janë tërhequr nga ajo zonë, ndërkohë që hetuesit kanë filluar punën për zbardhjen e të gjitha rrethanave që ndërlidhen me këtë rast, i cili nga prokurori i shtetit është cilësuar si lajmërim i rrejshëm”, thuhej në përgjigjen e Policisë së Kosovës, për “Bota sot”.
Por, të nesërmen u zbulua që thirrja ishte bërë nga Serbia, përkatësisht nga qyteti i dominuar me shqiptarë nga Bujanoci, por kërcënuesi ishte serb.
Rritja e rasteve me rrezikshmëri për vendin, po shqetëson qytetarët, ndërsa ekspertët tërheqin vërejtjen për rritje të vigjilencës së sigurisë.
Të enjten, me 23 dhjetor, ndodhi një kërcënim për sulm terrorist me bombë në Stacionin e Autobuësve në Prishtinë. Policia u detyrua t’i evakuojë udhëtarët nga aty, duke e mbajtur për disa orë të bllokuar stacionin.
Pas kontrollimit të hapësirës njësitet kompetente kundër minave, nga rezultoi se nuk kishte rrezik, por ishte një kërcënim i rrejshëm.
“Njësitet policore janë tërhequr nga ajo zonë, ndërkohë që hetuesit kanë filluar punën për zbardhjen e të gjitha rrethanave që ndërlidhen me këtë rast, i cili nga prokurori i shtetit është cilësuar si lajmërim i rrejshëm”, thuhej në përgjigjen e Policisë së Kosovës, për “Bota sot”.
Por, të nesërmen u zbulua që thirrja ishte bërë nga Serbia, përkatësisht nga qyteti i dominuar me shqiptarë nga Bujanoci, por kërcënuesi ishte serb.
A është ky një kërcënim i qëllimshëm nga Serbia, me qëllim të destabilizimit të Kosovës, përfshirë provokimet tjera.
Lidhur me këtë rast, njohësit e çështjeve politike treguan nëse Serbia po vazhdon të përfshihet në krim të organizuar në Kosovë dhe në përpjekje për destabilitet.
Mulliqi: Serbia nuk është duke i ndalur përpjekjet e saj për ta destabilizuar Kosovën
Skënder Mulliqi komentues, në prononcimin për “Bota sot” u shpreh se alarmit për bombë në Stacionin e Autobusëve në Prishtinë i paraprinë arrestimet në Shtërpcë.
“Ngjarjet e fundit me arrestimet për krim të organizuar, por edhe më herët kanë vërtetuar se serbët së bashku me shërbimin sekret të BIA-s, me akte të ndryshme të dhunës, e kanë kërcënuar Kosovën dhe pavarësinë e saj. Dihet edhe për faktin se kurrë nuk u shpërbënë strukturat kriminale serbe në veri, dhe as në enklavat tjera të Kosovës”, deklaroi ai.
Në vazhdim, ai përmendi edhe shpërthimet e pas luftës me bomba nga strukturat serbe, më saktësisht mbi lumin Ibër.
Krahas kësaj, Mulliqi vlerësoi se veriu i Kosovës është shndërruar në oazë të krimit të organizuar dhe kontrabandave të ndryshme në krye me serbin Radojqiq.
“Pas luftës kishim shumë shpërthime me bomba nga këto struktura, mbi lumin Ibër duke e ndarë qytetin e Mitrovicës në dysh. Këto struktura kriminale vepruan hapur duke i rrahur shqiptarët dhe ndonjë ndërkombëtar në veri të vendit. Këtë gjë e bënë që të pengojnë shtrirjen e sovranitetit të organeve tona në atë pjesë të Kosovës. Veriu moti është shndërruar në oazë të krimit të organizuar dhe kontrabandave të ndryshme në krye me serbin Radojqiq, që është edhe nënkryetar i Listës Serbe, e cila vepron në kuadër të institucioneve tona të shtetit. Radojqiqi dhe Veselinoviqi me grupet e tyre kriminale, këtyre ditëve u shpallën persona non grata nga DASH”, theksoi analisti.
Më tej, Mulliqi potencoi se lajmi i rrejshëm për vendosjen e bombës në Stacionin e Autobusëve në Prishtinë, nga një serb i Bujanocit, hyn në rastet qëkanë qëllim për të krijuar ndjesinë e pasigurisë dhe gjendje të psikozës në Kosovë.
“Aq më keq për Kosovën kur këta kriminelë gjetën bashkëpunim edhe me shqiptarë në veprimtaritë e tyre kriminale. Këto struktura janë filiale e Beogradit zyrtar për të destabilizuar Kosovën, dhe për ta paraqitur para bashkësisë ndërkombëtare si vend të pasigurt për minoritetin serb. Edhe ngjarjet e fundit në veri, kur Vuçiq na kërcënoi me luftë, hyjnë në kuadër të propagandës së errët serbe, për ndarje etnike të Kosovës, duke tentuar jetësim me çdo kusht të asociacionit me kompetenca ekzekutive. Edhe lajmi që doli se kërcënimi ishte i rrejshëm për vendosjen e bombës në Stacionin e Autobusëve në Prishtinë, nga një serb i Bujanocit, hyn në përpjekjen për të krijuar gjendje të pasigurisë dhe gjendje të psikozës në Kosovë”, thotë ndër të tjera ai.
Në fund, analisti nënvizoi se të gjitha këto veprime lënë të nënkuptojnë se Serbia nuk është duke i ndalur përpjekjet e saj për ta destabilizuar Kosovën, ku edhe vet presidenti serb, Vuçiq ka biografi kriminale në kohë të luftës.
“Edhe vet presidenti serb, Vuçiq ka biografi kriminale në kohë të luftës, të cilat aktivitetet të ndyta, nuk është duke i ndaluar. Organet tona të sigurisë do të duhej të jenë të përgatitura për çdo situatë të krijuar, por edhe të ndalin çdo aktivitet kriminal nga çdo anë që vjen. Lufta kundër krimit dhe korrupsionit duhet të mos ndalet, nëse ajo ka filluar mirë nga organet tona të shtetit”, përfundoi Skënder Mulliqi për “Bota sot”.
Mehmeti: Presidentja Osmani duhet të thërrasë mbledhje urgjente të Këshillit të Sigurisë kombëtare
Faton Mehmeti komentues i zhvillimeve, thotë se përpjekjet e Serbisëpër destabilizim të Kosovës nuk do të ndalen.
Ai në prononcimin për gazetën “Bota sot” paralajmëroi edhe provokime të reja nga ana e shtetit serb.
“Kjo është hakmarrje e Vuçiqit për pengesën që po i bën Kosova “Ballkanit të hapur", duke u bërë pengesë për jetësimin e ëndrrës së tij, daljen e Serbisë në det. Do të kemi edhe të tjera provokime të formave të ndryshme nga Serbia, me urdhër të Vuçiqit dhe shërbimeve sekrete që operojnë në Kosovë”, theksoi analisti.
Gjithashtu, Mehmeti kërkoi nga AKI-ja që të tregohet e vëmendshme në muajt në vazhdim, në mënyrë që t’i shmang provokimet, të cilat cenojnë sovranitetin e Kosovës.
“Me këtë duhet që AKI-ja ta shtojë vëmendjen në muajt në vazhdim, në mënyrë që mos të ketë provokime, të cilat cenojnë sovranitetin e vendit, duke u përdorur pastaj nga Serbia si arsye që Kosova nuk mund të qëndrojë shtet i pavarur. Kështu që, me ketë rast duhet të shtohet mbikëqyrja për njerëz që futen në Kosovë, por edhe ata që janë këtu dhe punojnë kundër vendit tonë. Në këtë kuptim, pres që të ketë edhe të tjera provokime”, tha ndër të tjera ai.
Në fund, analisti kërkoi nga presidentja Osmani që të thërrasë mbledhje urgjente të Këshillit të Sigurisë kombëtare, në mënyrë që të merren masa.
“Shpresoj se Presidentja e vendit të thërrasë mbledhje urgjente të Këshillit të Sigurisë kombëtare, në mënyrë që të merren masa. Pengesat e Kosovës për “Open Ballkan” do të sjellin edhe situata tjera në vazhdim, kryesisht në veri dhe pjesët ku ka serbë, dhe jo vetëm”, përmbylli Faton Mehmeti për “Bota sot”.
