Megjithëse humbja e papritur e nuhatjes është bërë kohët e fundit një shenjë dalluese e Covid-19, shkencëtarët paralajmërojnë se mund të jetë gjithashtu një shenjë e hershme e demencës.
Disa studime kanë lidhur më parë humbjen graduale të shqisës së nuhatjes me dëmtimin e kujtesës, por hulumtimet e reja sugjerojnë se përkeqësimi i shpejtë i kësaj ndjesie mund të jetë gjithashtu një tregues i rëndësishëm.
Shkencëtarët amerikanë kanë ndjekur më shumë se 500 të rritur të moshuar në SHBA prej më shumë se 20 vitesh.
Ata që përjetuan anosminë, një humbje të papritur të shqisës së nuhatjes, gjatë disa viteve kishin pothuajse dy herë më shumë gjasa të zhvillonin sëmundjen e Alzheimerit në krahasim me ata që e përjetuan atë gradualisht gjatë dekadave.
Autori i studimit, profesori Jayant Pinto i Universitetit të Çikagos, tha se ai dha një tjetër të dhënë për lidhjen midis shqisës së nuhatjes dhe demencës. Ai sugjeroi që testet e nuhatjes të bëhen të zakonshme, si dhe ekzaminimet e dëgjimit dhe shikimit për njerëzit e moshuar për të zbuluar sëmundjen më herët.
Kujtesa luan një rol kyç në aftësinë për të njohur aromat, dhe studiuesit kanë njohur prej kohësh lidhjen midis shqisave dhe rënies njohëse.
Autorja tjetër e studimit, Rachel Pacyna, shtoi se humbja e papritur e nuhatjes përkeqësohet me kalimin e kohës dhe me shumë gjasa jep shenjat e para që lidhen me sëmundjen e trurit ose me Alzheimerin.
“Nëse ne mund të identifikonim herët njerëzit në të 40-at, 50-at dhe 60-at e tyre që janë në rrezik më të lartë, ne mund të kishim informacion të mjaftueshëm për t’i regjistruar ata në provat klinike dhe për të zhvilluar ilaçe më të mira”, shtoi ajo.
