Studiuesit italianë nga Instituti i Biologjisë dhe Patologjisë Molekulare të Këshillit Kombëtar të Kërkimeve (CNR-IBPM) kanë zbuluar një molekulë të aftë për të bllokuar rritjen e qelizave kancerogjene.
Identifikimi i saj mund të çojë në të ardhmen në zhvillimin e ilaçeve inovative kundër kancerit, të afta për të luftuar disa sëmundje onkologjike.
Molekula, e quajtur SM15, është citotoksike dhe vepron si një frenues i fuqishëm i një mekanizmi specifik të përfshirë në vdekjen dhe mbijetesën e qelizave kancerogjene: autofagjinë. Ky proces heq në mënyrë selektive proteinat e dëmtuara brenda qelizave dhe përdor përbërësit e tyre për t’i ricikluar ato dhe për të zhvilluar molekula të reja proteinike.
Në disa lloje kanceri, autofagjia shndërrohet në një avantazh për të nxitur rritjen dhe rrjedhimisht përhapjen e qelizave kancerogjene. Falë zbulimit të aftësisë së SM15, ekziston shpresa për terapitë e ardhshme antikancerogjene.
Aftësia e SM15 për të bllokuar autofagjinë dhe për rrjedhojë rritjen e qelizave tumorale (të paktën e disa neoplazmave) u identifikua nga një ekip kërkimor i CNR-IBPM, i cili i përket Departamentit të Biologjisë dhe Bioteknologjisë “Charles Darwin” të Universitetit Sapienza, Romë.
Tetë studiues morën pjesë në studim: Francesca Romana Pellegrini, Sara De Martino, Giulia Fianco, Irene Ventura, Davide Valente, Mario Fiore, Daniela Trisciuoglio dhe Francesca Degrassi. Meqenëse autofagjia luan një rol të rëndësishëm në kancer, shkencëtarët filluan të hetojnë vetitë e molekulës SM15, “e projektuar për të synuar mikrotubulat dhe domenin ndërveprues të mikrotubulave dhe komponentin kinetokor NDC80/HEC1”, siç theksohet në përmbledhjet e studimit, shkruan fanpage.it.
Gjatë eksperimentit ata zbuluan se SM15 ishte një frenues i fuqishëm i procesit të autofagjisë. “Duke përdorur disa teste biokimike dhe biologjike qelizore, ne demonstruam se SM15 bllokon fluksin autofagjik bazal duke penguar bashkimin e autofagozomeve të formuara siç duhet me lizozomet,” shpjegoi Dr. Trisciuoglio – koordinator i studimit – dhe kolegët.
Autofagozomet janë vezikulat me dy membranë ku proteinat (përbërjet e plazmës) izolohen dhe degradohen gjatë procesit të autofagjisë, duke lejuar riciklimin.
