Qazim Rasha, babai i 25-vjeçarit, Klodian Rasha që mbeti i vrarë nga policia në Laprakë të Tiranës, është shprehur i revoltuar me veprimin e efektivit të policisë.
Babai i të riut që humbi jetën, pasi u qëllua me dy plumba nga një efektiv, ka deklaruar në “Opinion” se djali i tij së shpejti do të martohej, ndërsa kërkon me dëshpërim zbardhjen e çështjes.
"Fatkeqësi e imja, mos i ndodhtë askujt. Çfarë mund të thotë një baba për një djalë 25-vjeçar që kishte dalë të marrë një paketë cigare. E të iki se nuk ka maskë dhe të masakrohet nga policia. Edhe kriminel të ishte mund ta arrestosh, ai ishte tek dera e shtëpisë, – tregon i ati. – Edhe nëse do të kishte bërë faj, mund ta kapte policia, ta arrestonte, ta burgoste, të bënte çfarë të donte nëse kishte bërë faj. Por ta masakrojë policia një fëmijë 25 vjeç, kur unë e kisha për ta martuar. Po prisnim për ta martuar. Nuk mund të them asgjë, asgjë".
Qazim Rasha tregon për të birin se ishte në punë të tij dhe se ka qenë një tip i mbyllur. Ai mohon që djali i tij të ketë qenë i armatosur.
"Ka dëshmitarë që e kanë parë skenën, duke u zënë me policin, duke e gjurmuar dhe duke e rrahur aty në rrugë. Ai ka dalë me pi një kafe dhe ka ardhur për tek shtëpia. Kur ka parë policin ishte pa maskë dhe ata e kanë ndjekur. Nëse ka shtet, nëse funksionon ligji, nëse ai ka qenë me armë, unë e pushkatoj. Nëse djali ka qenë duke ikur për një maskë dhe të masakrohet fëmija në derë të shtëpisë në lagje… Këtë edhe serbi nuk ta bën, nëse shkon dhe kalon matanë të kap dhe të arreston. Por të shkosh të shikosh kufomën, është degjenuar kufoma".
Po ashtu, babai i të riu ka përgënjeshtruar lajmet që kanë qarkulluar dje, përfshirë dhe njoftimin e policisë, se Klodiani ka qenë një person me precedentë penal.
"E bëjnë për të maskuar ato punët e veta, nëse ekziston një nga këto gjëra, unë varem këtu. Po nuk kanë lidhje fare, këto janë budallaqe. Më tha vetë shefi, që ato e kanë bërë atë, janë maskarenj. Të zbardhet e vërteta, ndryshe pastaj nuk mund të…”.
25-vjeçari Klodian Rasha u vra nga një efektiv i forcave “Shqiponja” rreth orës 01:45 të mëngjesit në rrugën “Dritan Hoxha” në Laprakë.
Polici pretendoi se i riu kishte armë në dorë dhe e qëlloi duke e lënë të vdekur. Ai është arrestuar dhe akuzohet për tejkalim të kompetencave për përdorimin e armës së zjarrit.
