Presidentja e Komisionit Europian, Ursula Von der Leyen ka postuar në faqen e vet në Instagram një letër të shkruar nga Erjola, një 16-vjeçare nga Kurbini.
Në letrën e shkruar me shkrim dore, vajza e falenderon Von der Leyen për rindërtimin e shkollës së saj të shkatërruar nga tërmeti i 26 nëntorit.
“Kjo letër më preku. Nuk është vetëm një rrëfim thellësisht personal i përvojës së saj. Është gjithashtu një kujtesë e fuqishme e të mirave që mund të arrijmë si evropianë kur punojmë së bashku. Në këtë rast BE-ja dhe Shqipëria”, shkruan Von der Leyen.
Zyrtarja e lartë e BE risjell në vëmendje angazhimin maksimal të BE 2 vjet më parë, kur Shqipëria u godit nga tërmeti 6,4 i shkallës Rihter që la pas viktima dhe shkatërrim.
“I gjithë Bashkimi Evropian u mobilizua me shpejtësi për një vend që është në zemër të kontinentit tonë dhe që shpresoj dhe jam i bindur se një ditë do të jetë gjithashtu pjesë e Bashkimit tonë. Të njëjtën shpresë shpreh edhe Erjola në letrën e saj. ‘Sot unë, miqtë e mi ndihemi europianë të vërtetë’, shkruan ajo”, lexohet në postimin e Von der Leyen.
Bashkimi Europian dhuroi 115 milionë euro për rindërtimin pas tërmetit, të përqendruara në dy programe “BE për shkollat” dhe “BE për kulturën”, i pari 75 milionë euro, ndërsa i dyti 40 milionë euro.
Në një intervistë për Euronews Albania pak ditë më parë, ambasadori i BE në vendin tonë, Luigi Soreca i cili gjithashtu ka postuar në rrjetet sociale letrën e 16-vjeçares për Von der Leyen, tha se deri tani me donacionet e BE janë ndërtuar 19 shkolla, 22 do të ndërtohen deri në mars 2022 dhe 63 deri nëntorin e ardhshëm.
Gjatë vizitës së saj pak kohë më parë në Shqipëri, presidentja e Komisionit Europian Ursula Von der Leyen përuroi shkollën ‘Korb Muça’ dhe kopshtin ‘Europa’ në Krujë, të rindërtuara me fondet e BE-së.
