Mbi 500 familje në Laç, do të futen në banesat e reja të rindërtuara për banorët e prekur nga tërmeti i 26 nëntorit, ndërtimi i të cilave është financuar nga qeveria turke.
I pranishëm në ceremoninë e dhurimit të banesave ishte kryeministri Edi Rama, ambasadori turk Murat Ahmet Yörük, si dhe ministri për Rindërtimin, Arben Ahmetaj.
"Aty ku nga rrënojat dhe terri i dëshpërimit prej pabesisë së tërmetit, ka lindur shpresa plot dritë e një jete të re për 500 familje, të cilat kthehen në banesa të reja për ta gëzuar Vitin e Ri familjarisht, në një strehë të bukur e të sigurt, brenda një lagjeje të bukur europiane," thotë Rama.
Rama tha se këtë lagje do donte ta kishte çdokush në Tiranë dhe ndryshe nga lagjet e Tiranës.
Rama: Ndryshe nga lagjet e Tiranës që janë me këto standarde dhe kushtojnë shumë shtrenjtë, ju këto shtëpi do t'i keni falas dhe me dokumente pronësie si çdo pronar i ligjshëm.
Zoti Rama nuk harroi sërish të thumbonte PD.
Rama: Duke qenë se ju këtu votoni masivisht atë partinë tjetër, duhet të bëni kujdes mos ju ndërrojnë bravën.
Ai e vazhdoi më tej batutën duke i kërkuar qytetarëve të ngrinin dy gishtat lart.
Rama: Aman m'i ngrini dy gishta se s'po shoh në asnjë vend. Ja i ngriti, shumë mirë.
Rama tha se rindërtimi është bërë për të gjithë pa dallim, demokratë apo socialistë pasi sipas tij është një program për shqiptarët.