Ngjarja e ndodhur një ditë më parë në Gramsh ku dy rusë dhe një ukrainas sulmuan dy ushtarë shqiptarë në uzinën e armëve në Gramsh është raportuar edhe në median ruse.
The Moscow Times, shkruan se një nga personat e arrestuar dyshohet se sulmoi rojen teksa përpiqej të fotografonte fabrikën e Gramshit e cila përdoret për çmontimin e armëve të vjetra.
Shkrimi i plotë:
Dy ushtarë shqiptarë u plagosën teksa po përpiqeshin të ndalonin dy rusë dhe një shtetas ukrainas të hynin në një fabrikë ushtarake, tha ministria e mbrojtjes e vendit të shtunën vonë në mbrëmje.
Një nga të dyshuarit dyshohet se sulmoi rojet ndërsa përpiqej të fotografonte fabrikën e Gramshit në Shqipërinë qendrore, e cila përdoret për çmontimin e armëve të braktisura, tha ministria në një deklaratë.
"Në përpjekje për t'i shpëtuar kontrollit, një nga shtetasit rusë, i identifikuar me inicialet MZ, 24 vjeç, përdori spraj neuroparalizues mbi dy rojet e sigurisë," shtoi ministria.
Dy të dyshuar të tjerë - një shtetas rus i identifikuar si ST, 33 vjeç dhe shtetasi ukrainas FA, 25 vjeç - u arrestuan gjithashtu pranë fabrikës.
Dy ushtarët shqiptarë të plagosur u dërguan në spitalin e Tiranës pasi pësuan lëndime në sy, thuhet në deklaratë.
Kryeministri shqiptar Edi Rama tha se tre personat ishin "të dyshuar për spiunazh".
Policia ushtarake, së bashku me agjencitë e inteligjencës dhe antiterrorizmit, shkuan në vendngjarje për të hetuar ngjarjen.
Shqipëria është anëtare e NATO-s që nga viti 2009.
