Aktivistja Brizida Gjikondi, duke komentuar hapjen e fushatës elektorale të Partisë Socialiste pa pasur organizime të mëdha, e konsideroi si shenjë se kryeministri Edi Rama e ndjen të sigurt fitoren në zgjedhjet lokale të 14 majit. E ftuar dje në një studio televizive, Gjikondi theksoi se fakti që përballë Ramës qëndrojnë kandidatë të koalicionit Meta-Berisha është një komoditet shumë i madh për Partinë Socialiste.
“Rama nuk e bëri të bujshme fushatën sepse e ndjen se e ka fitoren në xhep. Të kesh përballë kundërshtarë si Berisha dhe Meta është një komoditet shumë i madh. Ata janë karma e vetes së tyre, nuk ka nevojë Rama të merret me ta. Patjetër që fushata e tyre do jetë bombastike, hapet nesër. Por shqiptarët nuk janë më të interesuar pr të shpëtuar nga halli krerët e opozitës shqiptare. Sepse ata janë bashkë nga halli jo nga malli. Këto zgjedhje janë të rëndësishme për ekzistencën e tyre në skenën politike shqiptare”, deklaroi ajo.
Ndërsa teksa foli për rezultatet e sondazhit të institutit italian ‘Piepoli’ të realizuar në bashkëpunim me Report TV për qytetin e Tiranës, aktivistja u shpreh se mbështetja e qytetarëve e treguar në sondazh për Veliajn tregon se ky i fundit preferohet përballë kandidatëve përballë tij, edhe pse drejton bashkinë më të madhe në vend prej 8 vitesh.
“Ai vjen pas dy mandatesh rresht, tregon se në përgjithësi 3 mandate nuk është se të konsumojnë. Për sa kohë që ka kaq mbështetje, është tregues se qytetarët e Tiranës përballë kandidatëve të tjerë, preferojnë atë për të vazhduar projektin që ka për kryeqytetin”, nënvizoi Gjikondi.
Më tej, ajo shtoi se Meta dhe Berisha e kishin përzgjedhur me qëllim Këlliçin për të kandiduar në Tiranë pasi ky i fundit nuk kishte asnjë përvojë të mëparshme në poste kyç shtetërore, gjë që sipas Gjikondit, tregonte se dyshja opozitare dëshiron t’u tregojë qytetarëve se vota e tyre për Këlliçin, praktikisht llogaritet si votë për ta.
