Ministrja për Evropën dhe Punët e Jashtme, Olta Xhaçka ka pritur në takim homologun e saj kroat, Gordan Grlic-Radman i cili ka deklaruar se Kroacia do të mbështesë Shqipërinë në procesin e integrimit në Bashkimin Evropian.
Pas takimit të zhvilluar në Tiranë, Xhaçka ka thënë se diskutime të tilla janë shprehje e qartë e vullnetit të dy vendeve për të zhvilluar në mënyrë intensive partneritetin strategjik.
Xhaçka: Radman më siguroi që Kroacia do të mbështesë procesi integrues të Shqipërisë
“Ecuria e Kroacisë në procesin e integrimit evropian, suksesi i saj, natyrshëm bën që çështjet e bashkëpunimit në fushën e integrimit të jenë në fokus të axhendës dypalëshe. Edhe sot, ne patëm rastin të bisedojmë gjerësisht për procesin e integrimit në BE dhe për ndihmën e këshillat që Kroacia mund të japë në këtë proces. Kolegu Radman më siguroi që Kroacia do të vazhdojë të jetë mbështetëse e pa rezervë e procesit tonë të integrimit në BE, jo vetëm politikisht, por edhe me ekspertizë teknike konkrete dhe më lejoni t’ju kujtoj që vetëm pak kohë më parë Kryeministri Rama i ka kërkuar homologut të tij ndihmën e ekspertëve kroatë të integrimit, për ekipin tonë negociator”, ka thënë Xhaçka.
Lidhur me këtë, ministri kroat, Gordan Grlic-Radman ka thënë se janë të gatshëm të ofrojnë mbështetje politike dhe teknike për Shqipërinë.
Grlic-Radman: Kroacia do të mbështesë rrugëtimin e Shqipërisë drejt BE-së
“Kroacia ka mbështetur dhe do të vazhdojë të mbështesë rrugëtimin e Shqipërisë drejt BE-së dhe mbetet aktive për të ndihmuar në të gjitha negociatat e anëtarësimit që ato të ecin me një ritëm sa më te shpejtë dhe të qetë që është e mundur. Kroacia është gati të ofrojë mbështetje politike dhe teknike për Shqipërinë për të realizuar transmetimet e të gjitha njohurive dhe përvojën e saj për integrimin e Shqipërisë në BE. Ne jemi të kënaqur që bashkëpunimi ynë ekonomik është në një trend rritës dhe këmbimet tona tregtare në vitin 2022 u rritën me 56.5%, por sigurisht mund të arrijmë shumë më tepër nëse forcojmë edhe më tej bashkëpunimin tonë sepse ne jemi vende fqinje”, ka thënë ai.
Në këtë takim, ministrja për Punët e Jashtme, Olta Xhaçka ka thënë se e ka vlerësuar mbështetjen që Kroacia i ka dhënë Kosovës që prej pavarësimit.
Xhaçka: Kroacia ia ka dhënë mbështetje Kosovës në gjithë procesin e konsolidimit
“Vlerësuam qëndrimin e Kroacisë në raport me Kosovën, mbështetjen e vazhdueshme që Kroacia i ka dhënë e jep shtetit të Kosovës që nga pavarësimi, në gjithë procesin e konsolidimit të tij, afirmimit në arenën ndërkombëtare, bërjen pjesë e organizatave ndërkombëtare e rajonale, përfshirë NATO-n dhe BE-në. Unë jam shumë optimiste që bashkërisht do të dimë të punojmë akoma më shumë për të çuar përpara bashkëpunimin mes nesh, në të mirë të popujve tanë, por edhe të rajonit”, ka thënë Xhaçka.
Ndër të tjera ministrja për Punët e Jashtme ka thënë se kanë sugjeruar mbajtjen e takimit të gjashtë të Komisionit të Përbashkët Ekonomik dhe të një Forumi Biznesi, në gjysmën e dytë të këtij viti.
Ajo gjithashtu ka theksuar se kanë shprehur interesimin për të mirëpritur më shumë investime kroate.
Sipas saj, në takim është konstatuar edhe nevoja për vendosjen e lidhjeve ajrore e detare ndërmjet Shqipërisë dhe Kroacisë, si dhe rëndësinë e ndërmarrjes së hapave konkretë për zbatimin e projekteve si Autostrada Adriatiko-Joniane dhe Gazsjellësi Adriatiko-Jonian.
