Manastirliu: Fuqizim i sistemit shëndetësor për përgatitjen ndaj emergjenca

Shqipëria

Manastirliu: Fuqizim i sistemit shëndetësor për përgatitjen ndaj emergjenca

Më: 23 maj 2023 Në ora: 23:29
Foto nga vendngjarja

Ministrja e Shëndetësisë, Ogerta Manastirliu ka zhvilluar një takim me Drejtorin e Përgjithshëm të OBSH-së, Dr. Tedros Adhanom Ghebreyesus, këtë të martë (23 maj) në Gjenevë. Në një postim në Facebook, Manastirliu bën me dije se në takim u diskutua për rëndësinë e adresimit të sfidave që solli pandemia, si përgatitja për emergjencat, investimet në sistemet shëndetësore, çështjet e shëndetit mendor si dhe edukimi në vazhdim i stafeve mjekësore.

“Trajnimi dhe edukimi i burimeve njerëzore përmes programeve të përbashkëta ndërmjet shteteve, është një ndër mekanizmat që mund të jenë pjesë e një platforme aktive komunikimi, për të forcuar burimet njerëzore në shëndetësi. Ne kemi interes për pjesëmarrjen në iniciativën e trajnimit dhe edukimit në vazhdim infermierëve me synim rritjen e kapaciteteve dhe standardeve të cilësisë të kujdesit infermieror”, tha Manastirliu.

Duke folur për shërbimet në nivelin parësor për problematikat e shëndetit mendor në periudhën post-pandemi, Ministrja e Shëndetësisë dhe Mbrojtjes Sociale foli për zbatimin e një strategjie konkrete në kujdesin parësor.

“Ne kemi hapur 50 qendrat e para socio-shëndetësore dhe synojmë t’i zgjerojmë dhe me 50 qendra të tjera brenda vitit, duke rritur aksesin e qytetarëve në qendrat e kujdesit parësor për problematikat e shëndetit mendor”, u shpreh Ministrja Manastirliu.

Sipas Ministrisë së Shëndetësisë, Drejtori i Përgjithshëm i OBSH-së Dr. Tedros, vlerësoi progresin e bërë nga Shqipëria për rritjen e aksesit në shërbime shëndetësore për çështjet e shëndetit mendor.

“Shëndeti mendor është sfida më e madhe, sidomos me impaktin që la pas pandemia e COVID-19, ndaj është e rëndësishme rritja e aksesit në shërbime për shëndetin mendor”, tha Dr. Tedros.

Takimi mes Ministres së Shëndetësisë dhe Mbrojtjes Sociale Ogerta Manastirliu dhe Drejtorit te Përgjithshëm të OBSH dr. Tedros Adhanom, u zhvillua në kuadër të Asamblesë së 76-të të Organizatës Botërore të Shëndetësisë, që po mbahet në Gjenevë të Zvicrës, me pjesëmarrjen e politikbërësve, ekspertë dhe përfaqësues të institucioneve shëndetësore, ku po diskutohet për sfidat e sistemeve shëndetësore, impaktin e pandemisë në shëndetin e popullatës dhe nevojën për të bashkuar forcat dhe forcuar kapacitetet, për të garantuar përgatitje dhe përgjigje të shpejtë ndaj emergjencave shëndetësore si dhe rolin e teknologjisë dhe inovacionit në aksesin e shërbimeve shëndetësore.

commentFirst article
Sot mund të lexoni Shfletoni kopertinat