Në datë 1 Qershor hyn në fuqi struktura e re organizative e Policisë së Shtetit, e cila do të sjellë disa ndryshime. Bazuar dhe në hartën e re gjyqësore, e cila solli dhe shkrirjen e disa prokurorive në rrethe, disa komisariate do ndryshojnë juridiksion varësie.
Konkretisht, Komisariati i Kavajës që aktualisht është pjesë e Drejtorisë Vendore Tiranë do t’i kalojë në juridiksion Policisë së Durrësit.
Ndërkohë, Komisariati i Krujës që deri tani ka qenë nën varësinë e Durrësit do i kalojë juridiksionit të Policisë Tiranë.
Sakaq, struktura e re pritet të përforcojë dhe sektore si ajo e krimeve të rënda, e cila me ndryshimet e reja do të ketë në fokus vetëm hetimin e ngjarjeve apo veprimtarisë së grupeve kriminale. Ndërsa për sa i takon krimeve që si prapavijë kanë konfliktet banale apo ato brenda familjes është menduar krijimi i një sektori të ri.
Vëmendje e veçantë i është dhënë dhe krimit kibernetik që tashmë në çdo drejtori vendore do të ketë një sektor të veçantë të hetimit. Ky ndryshim ka si qëllim rritjen e kapaciteteve në luftën ndaj sulmeve kibernetike apo hetimin e krimeve që lidhen me këtë fushë.
Ndërkohë, një tjetër risi që pritet të sjellë struktura e re, është vëmendja që do i kushtohet objekteve arsimore. Kështu çdo komisariat policie do ketë në përbërje 3 specialistë zone të dedikuar vetëm për problematikat që lidhen me ambientet arsimore. Ky ndryshim vjen edhe pas disa incidenteve të regjistruara muajt e fundit në shkolla e gjimnaze të vendit.
