Policia e Shtetit ka arrestuar një 47-vjeçar në Tiranë, pasi i njëjti është kapur me rreth 50 doza të dyshuara të lëndës narkotike kokainë.
Sipas njoftimit të Policisë së Shtetit ai dozat me kokainë do t’i shiste në Dhërmi, Himarë e Drimadhe.
“Në kuadër të operacionit policor të koduar ‘Dhërmiu’, u arrestua në flagrancë shtetasi A. D., 47 vjeç, banues në Tiranë, (shtetas me precedentë të shumtë kriminal, për vepra penale si ‘Dhuna në familje’, “Prodhimi dhe shitja e narkotikëve’, ‘Plagosja e rëndë me dashje’ dhe ‘Falsifikimi i monedhave’).
Ky shtetas kishte përshtatur në bagazhin e automjetit me të cilin udhëtonte, një vend për fshehjen e lëndës narkotike.
Gjatë kontrolleve u gjetën dhe u sekuestruan në cilësinë e provës materiale rreth 50 doza të dyshuara të lëndës narkotike kokainë, të cilat nga informacionet e siguruara nga inteligjenca policore, dyshohet se 47-vjeçari do t’i shiste në lokale nate, në Drimadhe, Dhërmi dhe Himarë”, thuhet në njoftim.
