Nënkryetari i Partisë Demokratike zyrtare, Roland Bejko, deklaroi në studion e "3D" në RTSH se dalja nga skena politike e ish-kryeministrit Sali Berisha do të shënonte "fillimin e fundit të tranzicionit" politik në Shqipëri.
"Historia nuk fillon me z. Berisha, as regjimi i Ramës nuk filloi sot që i filluan hallet atij, për të qenë autoritar, diktatorial etj. Për këtë arsye u bë çadra, u dorëzuan mandatet në parlamentet, nuk morën pjesë në zgjedhjet lokale dhe për arsye të manipulimit të votave, Rama fitoi pushtetin dhe opozita humbi. Çështja është se Berisha i përdor këto, sepse ata elementë që duhen zgjidhur nga drejtësia kërkon t'i zgjidhë me mjete politike. Ky është konflikti. Një regjimi të cilit z. Berisha dhe njerëzve të vet është duke i firmosur gjithmonë e më shumë leje ndërtimi, me të njëjtët oligarkë, unë këtë nuk e pranoj. Këta janë bashkë dhe prandaj kam reaguar sot duke thënë se po të isha deputet në sallë do të kisha votuar për heqjen e imunitetit të z. Berisha. Politikisht ka ardhur momenti për t'i thënë 'stop'. Sikur të ndodhë që z. Berisha të dalë nga politika, ky do të jetë fillimi i fundit të tranzicionit, sepse tranzicioni do të plotësohej edhe me daljen nga politika të z. Rama. Ky është berishizmi," tha z. Bejko.
Për demokratin ish-prefekt të Beratit, z. Berisha dhe kryeqeveritari Rama e kanë shndërruar politikën në një teatër."
Nuk mund të shkojmë në parlament të djegim karriget, stolat, të ndezim flakadanë, të qëllojmë gardistët. Prandaj berishizmit duhet t'i jepet fund një orë e më parë. Është një teatër për të cilin Rama ka krijuar të gjitha kushtet. E privoi opozitën nga e drejta për komisione hetimore dhe Berisha po e shfrytëzon këtë, ndërkohë që vitin e kaluar kur ngritëm një komision të tillë Bardhi-Alibeaj për hetimin e investimeve strategjike në bregdet, Berisha nuk e mbështeti dhe doli kundër... Berisha e ndihmoi Ramën, duke kaluar një buxhet në interes të oligarkëve të përbashkët, me të gjitha investimet e mëdha strategjike të përqendruara në katër duar me fondet e qeverisë shqiptare. Dhe del Berisha para disa ditësh dhe tha 'e patë se ç'i punuam Edi Ramës?'" u shpreh z. Bejko.
