Pronat publike të shqiptarëve janë sërish në një rrezik shumë të madh. Projektet kriminale të dala nga sirtari i Ramës-Vuçiçit-Grenell po i vendosin sërish “flakën” trojeve shqiptare.
Ishulli i Sazanit pjesë e Parkut Kombëtar Sazan Karaburun, i vetmi park tokësor dhe detar në Shqipëri, një mrekulli e gjallë e natyrës Shqiptare dhe shtëpia e 36 specieve detare me rëndësi ndërkombëtare pritet t’i dhurohet dhëndrit të Donald Trump, Jared Kushner.
Projekti është që aty të ndërtohen resorte turistike. Si çdo krim dhe ky projekt po kërkohet të ndërtohet mbi gënjeshtra dhe kamuflime. Rama e mbrojti ditën e djeshme këtë aferë para Asamblesë Kombëtare të Partisë Socialiste.
“Këto ditë, Jared Kushner, një sipërmarrës i madh amerikan dhe dhëndri i ish-Presidentit Trump, shpalli publikisht ambicien për të realizuar dy investime të mëdha turistike në Shqipëri. Po ata që deri dje na tregonin Malin e Zi si shembull të paarritshëm për investimet e huaja direkte, sot flasin për rrezikun që i kanoset Sazanit nga kthimi në një xhevahir i kurorës së artë të turizmit në Mesdhe.
Delirojnë për rrezikun e shkatërrimit të një parku kombëtar imagjinar, të një zone të mbrojtur që e mbrojtur nuk ka qenë kurrë përveç se ushtarëve të Enver Hoxhës që vëzhgonin me dylbi zbarkimin e flotës së 7 amerikane në Shqipëri dhe zbulojnë se si doli në dritë arsyeja e errët për ndryshimin e ligjit për zonat e mbrojtura. Hija e ish-presidentit amerikan, i pengon ata më gojështhururit t’i bashkëngjiten këtyre zërave për mua, djali i paudhë që doli nga thesi i parave të Sorosit, me djalin për shpirt të armikut më të betuar të Sorosit”, tha Rama.
Afera
Yndyra e pazareve të Edi Ramës kundër interesit shqiptar, i cili ka futur në këto pazare Vuçiçin dhe Grenellin, pritet të dalë në sipërfaqe më vonë. Kushner, dhëndri i Donald J. Trump, konfirmoi se po mbyllte marrëveshje të mëdha të pasurive të paluajtshme në Shqipëri dhe Serbi.
Sipas medias amerikane “Neë York Times”, thuhet se planet e Kushner në Ballkan duket se kanë ardhur si rezultat i marrëdhënieve të ndërtuara gjatë kohës që Trump ishte në detyrë. Kushner, i cili ishte një zyrtar i lartë i Shtëpisë së Bardhë, tha se kishte punuar për marrëveshjet me Richard Grenell, i cili shërbeu për një kohë të shkurtër si ushtrues detyre i drejtorit të inteligjencës kombëtare nën administratën e Trump dhe gjithashtu si ambasador në Gjermani dhe i dërguar i posaçëm në Ballkan.
Grenell, ish-besniku i Donald Trump, njihet dhe si filo-serb dhe rus. Ai njihet dhe si mbrojtës i fortë i “non gratave” me lidhje të ngushta me Sali Berishën, por edhe me Ilir Metën. Gjithashtu Grenell ka punuar gjithë këto kohë fuqishëm në prapaskenë për ndarjen e Kosovës
Detajet nga projekti, sipas medieve amerikane
“Një nga projektet e propozuara do të ishte zhvillimi i një ishulli në brigjet e Shqipërisë në një destinacion turistik luksoz. Të dy këto dy projektet e para përfshijnë tokë të kontrolluar tani nga qeveritë respektive, që do të thotë se një marrëveshje do të duhej të finalizohej me qeveritë e huaja. Një projekt i tretë, gjithashtu në Shqipëri, do të ndërtohej në gadishullin e Zvërnecit, një zonë bregdetare prej 1000 hektarësh në jug të Shqipërisë që është pjesë e komunitetit turistik të njohur si Vlorë, ku do të ndërtoheshin disa hotele dhe qindra vila.
Të paktën sipas planit. Kushner dhe gruaja e tij, Ivanka Trump, kanë qëndruar kryesisht larg aktiviteteve politike të zotit Trump që nga sulmi i 6 janarit 2021 në Kapitol. New York Times iu afrua fillimisht zotit Kushner të mërkurën në mëngjes për projektet e tij të ardhshme në Ballkan. Ai fillimisht nuk pranoi t’u përgjigjej pyetjeve, duke u përgjigjur vetëm pasi zbuloi planet e tij për Bloomberg News të premten.
Por po ashtu, të dy, Kushner dhe zonja Trump vizituan Shqipërinë dy herë që kur Donald Trump u largua nga detyra e presidentit. Ata udhëtuan vendin me Grenell, madje u takuan edhe me kryeministrin e Shqipërisë, Edi Rama. Kushner dhe Trump, së bashku me Grenell, janë fokusuar pjesërisht në Sazan, një ishull mesdhetar në jug të Shqipërisë që deri në fund të Luftës së Ftohtë ishte përdorur nga Bashkimi Sovjetik dhe nga komunistët.
Plani është që në ishull të ndërtohet një hotel dhe vila luksoze. Ishulli i thyer prej dy miljesh katrore ka qindra bunkerë dhe tunele të epokës së Luftës së Ftohtë të projektuar për t’i bërë ballë sulmeve bërthamore dhe ka qenë kryesisht bosh që nga fundi i Bashkimit Sovjetik. Por është vetëm një gjysmë ore me skaf nga Vlora, një destinacion turistik në Shqipërinë jugore ku qeveria e Arabisë Saudite po shpenzon tashmë para për të përmirësuar shërbimin e energjisë elektrike dhe shërbimet e tjera publike për të ndihmuar në promovimin e turizmit në Shqipëri".
Udhëtimet me Grenell
Grenell, një ish-bashkëpunues i Fox News dhe konsulent mediatik, ka punuar ngushtë me zotin Kushner dhe firmën e tij të investimeve. Madje Grenell ka qenë i zëshëm për përpjekjet e tij për t’i kthyer marrëdhëniet që ai ndërtoi në Shqipëri dhe gjetkë në Ballkan në përfitime personale. Ai është kthyer vazhdimisht në rajon dhe është takuar me drejtues të industrisë së hotelerisë, si dhe me kryeministrin e Shqipërisë, Edi Rama, raporton gazetashqiptare.
“Ne po kërkojmë mundësi për të investuar përmes investimeve të huaja në Ballkan, por më konkretisht në Shqipëri, dhe bregdeti shqiptar është i mrekullueshëm”, tha Grenell në një nga një seri intervistash televizive dhe gazetash që ka bërë në Shqipëri në tre vitet e fundit.
Grenell shtoi në një intervistë televizive gati 90-minutëshe në Shqipëri vitin e kaluar se nuk kishte asgjë të keqe me arritjen e marrëveshjes së tij, sepse ai tani ishte jashtë qeverisë.
“Unë jam duke punuar në projekte, projekte të kapitalit privat, për të cilat mund të fitoj para,” tha ai. “Askush nuk duhet të kërkojë kurrë falje që dëshiron të fitojë para.”
"Korrikun e kaluar zoti Grenell së bashku me Ivanka Trump dhe zotin Kushner u takuan edhe me Ramën në Tiranë, kryeqytetin e Shqipërisë dhe u fotografuan të gjithë bashkë. Rama ka bërë presion prej afro një dekade për të hapur Sazanin drejt rizhvillimit si destinacion turistik, si dhe kërkon mënyra të tjera për të tërhequr investitorë të huaj në Shqipëri për të zgjeruar ekonominë e saj turistike.
Auron Tare, një ish-deputet i Kuvendit të Shqipërisë që ka shërbyer si këshilltar i Ramës, mori zonjën Trump dhe zotin Kushner në ishullin e Sazanit në vitin 2021 si pjesë e një vizite në Shqipëri që përfshinte një lundrim me një jaht dhe një Udhëtim me helikopter nëpër bregdet. Po ashtu, Tare, në një intervistë tha se ka diskutuar me Kushner dhe znj.Trump dëshirën për të zhvilluar Sazanin, por për ta bërë këtë në një mënyrë që do të ruante historinë dhe mjedisin e tij”, thuhet në artikullin e New York Times.
