Kryeministri izraelit, Benjamin Netanyahu, ka shtyrë për disa javë vizitën e tij në Shqipërinë.
Rama me Kryeministrin izraelit, NetanyahuMediat izraelite kishin njoftuar se Kryeministri Netanyahu do të vizitonte Tiranën më 1 nëntor, për herë të parë një vizitë e nivelit të lartë të shtetit izraelit. Shkak për këtë shtyrje mësohet të jetë vdekja e një prej bashkëpunëtorëve të Netanyahut në qeverinë e tij, David-Azoulai, ministrit për Shërbimet Fetare.
David-Azoulai, 64 vjeç, ka qenë prej 22 vitesh një mbështetës i fortë i Kryeministrit Netanyahu, i cili për herë të parë kishte marrë një post ministror, si ministër për Shërbimet Fetare. Burime pranë qeverisë thanë mbrëmë se nuk ka anulim të vizitës së Kryeministrit izraelit, por vetëm një shtyrje të saj, vizitë e cila pritet të realizohet brenda këtij viti.
Sipas mediave izraelite, Zyra e Kryeministrit ka theksuar se do të vizitojë Tiranën më 1 nëntor dhe se Netanyahu do të marrë pjesë në një samit rajonal që do të zhvillohet në Shqipëri në fillim të muajit tjetër.
“Vizita në Shqipëri, një vend me maxhorancë myslimane me lidhje historike miqësore me Izraelin, pritet të jetë udhëtimi më i lartë për sa i përket nivelit të një izraelit në vend. Në vitin 1994, ministri i Jashtëm i atëhershëm, Shimon Peres, vizitoi Tiranën dhe këtë vit qyteti e demoralizoi udhëtimin me një pllakë përkujtimore për ish-shtetarin”, shkruan gazeta izraelite “The Times of Israel”.
Netanyahu do të qëndronte, sipas axhendës së Kryeministrit izraelit, një ditë në Shqipëri dhe më pas do të udhëtonte ditën tjetër drejt Bullgarisë, ku në Sofje do të takohej me liderët e Greqisë, Rumanisë, Bullgarisë dhe Serbisë.
Vizita
Në dhjetor të 2015, Kryeministri Rama zhvilloi një vizitë zyrtare në Izrael ku u prit nga homologu i tij Benjamin Netanyahu, gjatë së cilës nënshkruan Deklaratën e Miqësisë mes dy vendeve.
Kryeministri Rama ishte ftuar në Jerusalem nga Benjamin Netanyahu në një vizitë zyrtare, që përkonte me 25-vjetorin e vendosjes së marrëdhënieve diplomatike mes dy vendeve. Shqipëria dhe Izraeli, sipas Ramës, janë aleatë në luftën kundër terrorizimit. Kryeministri izraelit, që në fillim të fjalës së tij pas takimit zyrtar mes dy delegacioneve, nuk harroi të falënderonte popullin shqiptar për mbrojtjen që i ka bërë popullsisë hebre që përndiqej nga nazistët.
“Ne e dimë se Shqipëria është mike e mirë e Izraelit. Ne celebrojmë 25 vjet marrëdhënie dhe e dimë se populli shqiptar nuk është ngushtësisht i lidhur me popullin izraelit sot, por gjatë periudhës së vështire të Holokaustit, shqiptarët kanë qëndruar krah më krah me popullin hebre që u persekutua në Europë. Unë mendoj se Shqipëria është vendi i vetëm ku popullata hebre u rrit për shkak të refugjatëve dhe falë miqësisë që populli shqiptar tregoi. Ne nuk i harrojmë kurrë miqtë tanë dhe vlerësojmë ndjenjën e njerëzimit dhe qytetërimit dhe kurajën që treguat gjatë kohës sonë më të zymtë”, u shpreh Netanyahu gjatë vizitës së Kryeministrit Rama.
Bushati në shtator në Izrael, për vizitën e Netanyahut
Ministri për Europën dhe Punët e Jashtme, Ditmir Bushati, zhvilloi në shtator një vizitë në Jerusalem për të përgatitur ardhjen e Kryeministrit Netahyahu në Tiranë. Bushati u prit dhe nga Kryeministri Netanyahu, i cili vlerësoi qasjen e Shqipërisë ndaj sfidave të sigurisë në rajon dhe më tej, si dhe shprehu interesin e Izraelit për të forcuar më tej bashkëpunimin në këtë fushë. Ministri Bushati dhe Kryeministri Netanyahu diskutuan gjithashtu për mundësinë e bashkëpunimit në fusha me interes reciprok si: inovacioni, ekonomia, arsimi, kultura, etj. Gjatë kësaj vizite në Izrael, Bushati zhvilloi disa takime bilaterale si: me ministrin e Mbrojtjes, Avigdor Lieberman; ministrin për Bashkëpunimin Rajonal, Tzachi Hanegbi; lideren e opozitës, Tzipi Livni; drejtuesit e Komitetit Amerikano-Hebre (AJC) David Harris dhe Kongresit Botëror të Hebrenjve (WJC) Robert Singer.
