Mundësit Egzon dhe Edon Shala po i vazhdojnë përgatitjet në Prizren, shpenzimet e të cilave po i mbulon KOK-u.
Dy mundësit tanë, Egzon dhe Edon Shala, janë duke i vazhduar përgatitjet për Lojërat Olimpike Tokyo 2020.
Egzoni prej muajit shkurt të këtij viti ka fituar normën Olimpike Tokio 2020, ndërsa Edoni është duke kërkuar të bëhet mundësi i dytë me normë.
Të dy garuesit tanë po i vazhdojnë rregullisht përgatitjet në Prizren, nën udhëheqjen e trajnerit Sylejman Shala.
KOK ua ka mbuluar shpenzimet të dy mundësve Shala për përgatitjet prej datës 5 - 25 dhjetor 2020.
"Ne jemi në përgatitje prej tetorit këtu në Kosovë, sepse shkaku i pandemisë Covid 19 nuk kemi mundur të udhëtojmë në SHBA, edhe pse i kemi vizat. Normal jemi duke dhënë maksimumin për t'u përgatitur për garat e ardhshme, të cilat po na mungojnë shumë, pasi u bë kohë e gjatë pa gara jashtë Kosovës", tregon Egzoni për Komitetin Olimpik të Kosovës.
Ai bashkë me Edonin synojnë të fitojnë medalje në evropianin, që prej 19-25 prill mbahet në Poloni.
"Në vitin e ardhshëm do të marrim pjesë në kampionatin evropian, që do të mbahet në Poloni dhe jam shumë optimist që do të kthehemi me medalje. Tash na duhet përkrahje shumë më e madhe prej shtetit, pasi dihet që jam me normë Olimpike dhe duhet të marrim pjesë në kampe të njohura në SHBA, Rusi dhe në Evropë", shtoi Egzon Shala.
30-vjeçari ka fituar normën Olimpike në kategorinë deri në 125 kilogramë, disiplina stil i lirë.
Vëllezërit Shala janë pjesë e listës prej 19 sportistëve të KOK-ut, të cilët marrin Bursa Olimpike Tokio 2020 nga Solidariteti Olimpik i Komitetit Olimpik Ndërkombëtar.