Një ministër i qeverisë kanadeze kërkoi të premten që Meta të heqë ndalimin e lajmeve të brendshme nga platformat e saj për të lejuar njerëzit të ndajnë informacione për zjarret në perëndim të vendit.
Meta nisi bllokimin e lajmeve në platformat e saj Facebook dhe Instagram për të gjithë përdoruesit në Kanada këtë muaj në përgjigje të një ligji të ri që kërkon që gjigantët e internetit të paguajnë për artikujt e lajmeve.
Por disa njerëz që ikin nga zjarret në qytetin verior të largët Yellowknife janë ankuar në mediat vendase se ndalimi i pengoi ata të ndajnë të dhëna të rëndësishme për zjarret, shkruajnë mediat e huaja.
“Ajo që po bën Meta tani është krejtësisht e papranueshme… ne shohim se për shkak të këtij ndalimi, njerëzit nuk kanë qasje në informacione që janë absolutisht thelbësore”, ka thënë në një konferencë ministri i Transportit, Pablo Rodriguez.
“Kërkoj që Meta të anulojë këtë vendim”, vazhdoi Rodriguez, i cili në detyrën e tij të mëparshme si ministër i trashëgimisë mbikëqyrte legjislacionin që kërkon pagesa për artikujt.
Ndërsa Chris Bittle, një ligjvënës i Partisë Liberale në pushtet, u ankua të enjten se “veprimet e Meta për të bllokuar lajmet janë të pamatura dhe të papërgjegjshme”.
Në përgjigje, një zëdhënës i Meta tha se kompania kishte aktivizuar funksionin “Safety Check” në Facebook që lejon përdoruesit të ndajnë fjalën se ata janë të sigurt në vazhdën e një fatkeqësie natyrore ose një krize.
