Një njësi e Laboratorit Evropian për Mësimin dhe Sistemet Inteligjente (ELLIS) u përurua të hënën në Sofje. ELLIS është një rrjet ekselence pan-evropiane e AI (inteligjencës artificiale) që fokusohet në shkencën themelore, inovacionin teknik dhe ndikimin shoqëror.
I vendosur në ndërtesën e Institutit për Shkenca Kompjuterike, Inteligjencë Artificiale dhe Teknologji (INSAIT), objekti i ri u hap nga kryeministri I Bullgarisë, Nikolay Denkov. INSAIT u bë kështu institucioni i parë shkencor në Evropën Lindore që iu bashkua ELLIS.
Kryeministri tha se krijimi i INSAIT vitin e kaluar dhe ngritja e Njësisë ELLIS në Sofje ishin rezultat i përpjekjeve shumëvjeçare të disa qeverive të njëpasnjëshme, të cilat mbetën kryesisht të pavërejtura nga publiku dhe që ndihmuan Bullgarinë të rifitonte statusin e saj të lartë në fushën e shkencës. Ai e përshkroi inaugurimin e Njësisë ELLIS si "një ngjarje me rëndësi evropiane" dhe nënvizoi rolin e themeluesit të INSAIT, Martin Vechev, në krijimin e një instituti të AI të klasit botëror në Bullgari.
Kryeministri kujtoi traditën bullgare në matematikë, informatikë, shkenca natyrore dhe disa shkenca shoqërore, të cilat datojnë që prej shumë dekadash. "Kishte një periudhë kur ne shkencëtarët kishim ndjenjën se ndoshta ishim të padëshiruar dhe duhet të kërkonim një vend tjetër të cilit i përkasim në botë. Për fat të mirë, gjërat kanë ndryshuar për mirë," tha Denkov.
Martin Vechev vuri në dukje se AI po fiton një rëndësi gjithnjë e më të madhe strategjike në ekonomitë e botës dhe ka potencial për të transformuar sektorë të tërë. Investimet e mëdha në vendet jashtë Evropës kanë krijuar një rrezik që kontinenti të mbetet prapa në fushën e AI. ELLIS është përgjigja e Evropës ndaj sfidës, shtoi ai./
