Franca është bërë një vend i BE-së ku kompania e mediave sociale X, e njohur më parë si Twitter, ka bllokuar sasinë më të madhe të përmbajtjeve të dhunshme dhe të paligjshme, sipas një raporti të publikuar të dielën.
Raporti i parë i transparencës i kompanisë për kontrollin e përmbajtjes, i kërkuar nga Akti i Shërbimeve Dixhitale të BE-së (DSA), mbulon periudhën nga 28 gushti deri më 20 tetor.
Raporti tregon se fshirjet dhe pezullimet për komente të dhunshme dhe urrejtjeje brenda X ishin më të përhapura në Francë. Ndërmjet këtyre datave, 7.160 postime u fshinë në Gjermani, dhe 7,743 postime u hoqën në Spanjë, ndërsa ky numër u rrit në 16.288 në Francë.
Mes përmbajtjeve të fshira në Francë, kishte rreth 4.300 mesazhe ngacmuese, krahasuar me mbi 1.000 në Gjermani dhe 1.200 në Spanjë.
Për më tepër, në Francë u hoqën mbi 6.000 komente të dhunshme, në krahasim me më pak se 2.000 në Gjermani, 1.100 në Holandë dhe 4.100 në Spanjë.
DSA, e cila hyri në fuqi në gusht, mandaton platformat kryesore në internet si X, Meta, TikTok dhe Google që të ndërmarrin veprime për heqjen e të gjithë përmbajtjes së paligjshme dhe të ofrojnë informacion të detajuar mbi praktikat e tyre të moderimit të përmbajtjes.
