Elbasan Karaçica dyshohet se i ka vjedhur armën Bashkim Jasharit, djalit të Rifat Jasharit dhe gjeneralit të Forcës së Sigurisë së Kosovës (FSK).
Më 8 maj të këtij viti në fshatin Komoran, i dyshuari Elbasan Karaçica, në bashkëpunim me të dyshuarin tjetër Ahmet Kamberi, thyen xhamin e veturës së Bashkim Jasharit dhe ia vodhën një çantë në të cilën Jashari ruante armën e tij “Glock 17”.
Sipas një raporti të Prokurorisë së Shtetit të cilin e ka siguruar Insajderi, Karaçica dhe i dyshuari tjetër me inicialet Ahmet Kamberi, e kanë kryer vjedhjen rreth dy-tre minuta pasi Jashari kishte parkuar veturën dhe kishte dal nga ajo.
“I dëmtuari Bashkim Jashari, pjesëtar i FSK-së, e kishte parkuar veturën e tij ‘Landrover’, pronë e FSK-së, dhe pas një intervali kohor prej 2-3 minutave kur ishte kthyer tek vetura e tij kishte parë se i ishte thyer xhami i derës së pasme”, thuhet në raport.
Në çantën e vjedhur, Jashari ruante edhe dokumentet e tij personale.
“Nga ku i ishte marrë çanta e kraharorit në të cilën kishte pasur armën zyrtare Glock 17 dhe dokumente personale”, dyshon Policia.
Ndonëse ndodhen në kërkim, Policia e Kosovës nuk ka arritur t’i kap të dyshuarit prej disa javësh.
Madje, i dyshuari Elbasan Karaçica, pothuajse çdo ditë sfidon Policinë e Kosovës përmes rrjeteve sociale ku publikon fotografi të tij duke lëvizur lirshëm nëpër Kosovë.
Të premten, Karaçica ka publikuar një fotografi në një kafene në Kosovë, por Policia e Kosovës ende nuk ka arritur ta lokalizojë vendndodhjen e tij.
Media ka kontaktuar me Policinë e Kosovës për të kërkuar lidhur me kërkimet për kapjen e të dyshuarve, mirëpo Policia ka kërkuar kohë derisa të pranojë informata nga Stacioni Policor në Drenas.
Bashkim Jashari është djali i Rifat Jashari dhe nipi i Adem Jasharit, Komandantit të Ushtrisë Çlirimtare të Kosovës (UÇK). Ai është gjeneralbrigade dhe inspektor gjeneral i Forcës së Sigurisë së Kosovës.
