Ramush Haradinaj, i cili dha dorëheqje nga pozita e kryeministrit të Kosovës, pas pak çasteve do të niset për në Hagë, ku do të intervistohet pasi është thirrë nga Gjykata Speciale si i dyshuar.
Haradinaj, përmes një postimi në Facebook, thotë se sot i përgjigjet ftesës për intervistim nga Dhomat e Posaçme në Hagë.
“Tërësisht në të drejtën e Kosovës, i palëkundur për vendimet e mia jetësore dhe i patrazuar e ballëlartë”, shkruan Haradinaj, transmeton gazeta “Bota sot”.
Ai thotë se, Kosova ka ecur përpara në rrugëtimin euroatlantik dhe është e gatshme të dialogojë me Serbinë deri në arritjen e marrëveshjes finale.
“Luftëtarët e lirisë gjithmonë ishin të rreshtuar me të drejtën!
Sot, si Ramush Haradinaj, qytetar i Republikës së Kosovës, i përgjigjem ftesës për intervistim nga Dhomat e Posaçme në Hagë. Tërësisht në të drejtën e Kosovës, i palëkundur për vendimet e mia jetësore dhe i patrazuar e ballëlartë. Kosova ka ecur përpara në rrugëtimin euro-atlantik dhe është më e fortë se kurrë, në rreshtin e paqes dhe miqësi të përhershme me ShBA-në. Kosova është e gatshme të dialogojë me Serbinë deri në arritjen e një marrëveshjeje finale ligjërisht obliguese, përfshi njohjen reciproke në kufijtë ekzistues. Por, tregun e japim vetëm për njohje.
Me nder kam mbrojtur të drejtën tonë, dje, sot dhe do ta mbrojë gjithmonë!”, përfundon Ramush Haradinaj.