Gjykata Speciale veç ka nisur intervistimin e figurave të larta të luftës së UÇK-së.
Si rrjedhojë, Kosova ka mbetur pa kryeministër pas intervistimit nga Specialja të Ramush Haradinajt, që çoi në dorëheqjen e tij.
Lidhur me këtë çështje, sot është deklaruar edhe Rusia.
Zëdhënësja e ministrisë së Jashtme ruse, Maria Zaharova tha se Gjykata Speciale e formuar për krimet e supozuara të shqiptarëve nuk ka dhënë asnjë rezultat.
“Deri më tani, nuk ka rezultate nga puna e Hagës për krimet e UÇK-së. Askush nuk është akuzuar, megjithë dyshimet për vrasje dhe krime të tjera”, tha ajo.
Sipas saj, Specialja duhet të tregojë rezultatet e veta në punën e saj.
Specialja deri më tani në Kosovë ka dërguar një numër të konsiderueshëm ftesash për profile të ndryshme të pjesëtarëve të UÇK-së.
Shumica e ish-komandantëve të Ushtrisë Çlirimtare të Kosovës, pyetjeve të prokurorëve të Hagës i janë përgjigjur në heshtje.
