Ndonëse kanë kaluar më shumë se dy dekada nga lufta e fundit në Kosovë, Bajrush Ukismajli ende i vuan pasojat e asaj kohe. Dhimbja e tij është e freskët për gruan dhe vajzën 8-vjeçare, të cilat ia vranë serbët, dhe për jetën thotë se nuk u tregua aspak e drejtë me të.
“Dy ditë ka nejt xhenazja atje në dhe, shkojsha e kqyrsha në sabah, në akshom u kthejsh. Tani shkum me do kusheri me do kuaj me i marr kufomat dhe i varrosë këtu në varreza”,- u shpreh Ukismajli.
Pas kësaj, të gjitha përgjegjësitë e punët e shtëpisë i mbetën zotëri Bajrushit.
” Mu ka dasht me gatu, vishin njerzit prej vendeve të ndryshme më vetshin allahile mos e ki një kashore bukë a unë isha kisha nevojë për veti se gruja mu kish vra, qika mu kish vra”, tha tutje ai.
Ndërsa, qetësinë shpirtërore e gjen në vendlindjen e tij, nga e cila nuk largua as gjatë luftës, dhe në të cilën mbeti vetëm me djalin e vogël.
Megjithëkëtë, mendja i kishe shkuar që të martohej sërish, pasi që kishte mbetur i ve në moshë të re.
Pavarësisht asaj që ka kaluar deri tash, dashuria për atdheun e mirënjohja për vendlindjen e shtëpinë janë të mëdha.
