Përfaqësuesi i Bashkimit Evropian për Politikë të Jashtme, Josep Borrell, ka reaguar ashpër për aksionin e zhvilluar nga Policia e Kosovës në qytete të Kosovës, përfshirë pjesën veriore.
Ai ka kërkuar që të ndalen incidentet e dhunshme dhe veprimet e “njëanshme dhe të pakoordinuara”.
“Incidentet e dhunshme në veri të Kosovës duhet të ndalen menjëherë. Veprimet e njëanshme dhe të pakoordinuara që rrezikojnë stabilitetin janë të papranueshme”, ka shkruar Borrell në Twitter.
Atij për këtë deklaratë i ka reaguar Luan Dalipi, shef i kabinetit të kryeministrit të Kosovës Albin Kurtit.
Dalipi ka thënë se zyrtarët e BE-së nuk duhet ta bëjnë këtë problem politik apo etnik, pasi sipas tij, luftimi i krimit dhe kontrabandës është kompetencë tipike e një shteti sovran, përcjell Bota sot.
“I nderuar z. Borrell faleminderit për shqetësimin. Është e rëndësishme të mos portretizohet dhuna fatkeqe e nxitur nga disa huliganë të orkestruar nga Beogradi si një problem ndëretnik midis qytetarëve shqiptarë dhe serbë në Kosovë. Aksioni i sotëm i Policisë së Kosovës ishte në shënjestër vetëm kundër krimit dhe kontrabandës së kontrabandës në katër komuna kosovare, njëra prej të cilave ndodh të jetë në pjesën veriore të Kosovës (ku pak kriminelë nxitën dhunën). Andaj, askush, dhe në veçanti asnjë zyrtar i nivelit të lartë të BE-së, nuk duhet të përpiqet ta bëjë këtë problem politik apo etnik, dhe asnjë koordinim bilateral s’është i rëndësishëm në këtë rast, sepse luftimi i krimit dhe kontrabandës është kompetencë tipike e një shteti sovran”, ka shkruar Dalipi në një postim në Twitter./BS
