Qazim Osmani, i njohur me nofkën “Felixi”, është lajmëruar në rrjetet sociale pesë ditë pas arrestimit të vëllait të tij, Bashkimit, nën dyshimet për krim të organizuar.
“Felixi”, emri i të cilit është përmendur si pjesë e klanit “të familjes Osmani”, ka dërguar një mesazh të shkurtër.
“Këtu jam”, ka thënë Osmani, në mbishkrimin e një fotografie të publikuar në Facebook.
Një operacion i Rrjetit të Policisë Evropiane (EUROPOL), të martën ka vënë në pranga Bashkim Osmanin, vëllain e Qazimit.
Siç raportoi gazeta kroate Jutarnji List, Osmani u kap në Kroaci.
Mediat belge ishin të parat që raportuan për operacionin ku morën pjesë 600 policë dhe që u shtri në 7 vende evropiane, të organizuar nga Europol. Në shënjestër ishte një organizatë e trafikut të kokainës, në të cilën ishin të përfshirë edhe shqiptarët.
Qazim Osmani, i cili drejton një rrjet të kazinove në Evropë, bashkë me vëllezërit e tij, Bashkimin, Burimin dhe Bekimin, prej vitesh jetojnë në Gjermani.
Atje kanë pasur probleme me drejtësinë për pasurinë, por bizneset i shtrijnë edhe në Spanjë, Belgjikë, Holandë dhe vende të tjera europiane.
