Ministri i Shëndetësisë Rifat Latifi ka takuar sot një grup bashkatdhetarësh të komunitetit shqiptar nga qyteti i Izmir të Turqisë, ku u bisedua për mundësinë e bashkëpunimit të të dyja vendeve në sistemin shëndetësor.
Në këtë takim, ministri Latifi, tha se Kosova dhe institucionet e saj kanë shumë punë për të bërë, për ta zhvilluar sistemin shëndetësor në vend.
Ministri Latifi tha se Kosova ka mjekë, infermierë të jashtëzakonshëm, por duhet përmirësim i infrastrukturës, pasi shumë mjete financiare Kosova është duke i harxhuar jashtë shtetit për shërim të pacientëve, e të cilat po e varfërojnë vendin.
Në këtë takim, po ashtu ministri Latifi theksoi se bashkëpunimi me shtetin e Turqisë është i domosdoshëm, sidomos në shkëmbimin e përvojave të mjekëve dhe infermierëve.
Përfaqësuesi i grupit të bashkatdhetarëve, Rifat Salih, tha se komuniteti shqiptar në Turqi është i gatshëm të bashkëpunojë me Kosovën, për të përmirësuar dhe zhvilluar sistemin shëndetësor.
