Komuna e Deçanit është bërë subjekt i hetimeve nga Prokuroria Themelore e Pejës sepse në vazhdimësi ka refuzuar që ta zbatojë vendimin e vitit 2016 të Gjykatës Kushtetuese të Kosovës, përmes të cilit manastirit i njihet pronësia e 24 hektarëve tokë.
Nisja e hetimeve është konfirmuar sot nga kryeprokurori i Prokurorisë Themelore të Pejës, Agim Kurmehaj.
“Po, hetimet i kemi filluar. Procedura është te ne, kaq mund të them tani. Janë duke u marrë disa veprime në këtë drejtim”, ka thënë shkurtimisht Kurmehaj për Evropën e Lirë.
Së fundmi, kryetari i Deçanit, Bashkim Ramosaj ka thënë me bindje të plotë që institucioni që ai udhëheqë s’do ta zbatojë asnjëherë vendimin e Kushtetueses, duke theksuar se kjo është cështje që bien nën autoritetin e Agjencisë Kadastrale të Kosovës.
“Çështja realisht është komplet nën patronatin ose nën legjislacionin që shteti e rregullon. Është përgjegjësi e agjencionit kadastral. Sa i përket kadastrës së Deçanit, nuk ka me e zbatu kurrë”, ka thënë Ramosaj për gazetën.
“Edhe me mujtë me e bë, nuk kemi me e zbatu. Edhe me pasë mundësi, me pasë të drejtë me e bë, nuk kemi me e bë”, theksoi ai.
Nisja e hetimeve vjen thuajse nëntë muaj pasi Gjykata Kushtetuese e Kosovës i ka dërguar një letër kryeprokurorit të atëhershëm të shtetit, Aleksandër Lumezi, në të cilën është thënë se “i takon Prokurorisë së Shtetit të ndërmarrë veprime” për moszbatimin e aktgjykimeve, në përputhje me kompetencat e saj ligjore.
