Kryeministri Edi Rama ka reaguar sërish për tensionet në veri të Kosovës gjatë konferencës së përbashkët me kryeministrin spanjoll Pedro Sanchez.
I pyetur nga gazetarët, nëse ajo që ndodhi tregon pse Kosova nuk duhet të jetë pjesë e Ballkanit të Hapur, Rama tha se është pikërisht e kundërta.
“Unë jam në të drejtën time t’ju them që e kundërta është e vërtetë. Ngjarja e djeshme është pasqyrë e vështirësisë së thellë që ka në këtë marrëdhënie dhe siç e thashë, ushtrimi i sovranitetit në të gjithë territorin e shtetit të Kosovës, bazuar në marrëveshjen e dakordësuar mes Kosovës dhe Serbisë në Bruksel lidhur me temën që është bërë shkak i këtij acarimi, nuk është vetëm e drejtë dhe detyrë e qeverisë së Kosovës. Në këtë pikë unë e mbështes 100% qeverinë e Kosovës dhe autoritetet e Kosovës që marrëveshja të zbatohet”, tha Rama.
Ndër të tjera kryeministri Rama shprehu mbështetjen për qeverinë e Kosovës, duke thënë se morën vendimin e duhur me zbatimin e marrëveshjes e më pas shtyrjen e saj me 30 ditë.
Më tej ai shtoi se në situata të tilla Kosova dy rrugë ka, njëra e kthimit mbrapa dhe e luftës dhe rruga tjetër është të ulet në tryezën e Ballkanit të Hapur.
“E përgëzoj kryeministrin dhe autoritetin e Kosovës për vetëpërmbajtjen dhe që dëgjuan aleatët jo që shtyjnë marrëveshjen, por për të sqaruar.
Këto situata nuk tregojnë që Ballkani i Hapur është i panevojshëm apo është i gabuar. Nuk tregojnë që qasja jonë ndaj Serbisë dhe politika e afrimit, dialogut, është e panevojshme, këto situata tregojnë pse duhet Ballkani i Hapur. Kjo është arsyeja pse Kosova duhet të vijë e të ulet në tryezën e Ballkanit të Hapur. Kur gjërat shkojnë në thikë ka dy rrugë. Njëra e kthimit mbrapa dhe e luftës, nga e cila nuk fiton askush, rruga tjetër është ndërtimi i paqes.
Na duhet të punojmë edhe më kokëfortësisht për paqen, për të ndërtuar rrugë ndërveprimesh që na japin mundësinë të kuptojmë që nuk jemi dy palë qenie, ca njerëz e ca alienë. Jemi njerëz dhe kemi detyrim që t’u lëmë paqen fëmijëve tanë.
Me presidentin e Serbisë, marrëdhënia miqësore nuk më pengon të ndahem aty ku nuk jemi dakord. Spanja ka arsyet e veta që ta lexojmë ashtu siç e lexon marrëdhënien me Kosovën, por nuk e pengon të jetë për liberalizimin e vizave. Ashtu sikundër kjo nuk është një shprehje mosrespekti për mënyrën si ne shqiptarët e shikojmë këtë çështje.
Për mua qeveria e Kosovës ka bërë gjënë e duhur, ka mbështetjen tonë, edhe për shtyrjen e reciprocitetit. Fqinjët nuk i zgjedhim, këta kemi.
Nëse do kishim fqinjë tjerë mund të ishim më të mërzitshme, fqinjët nuk i zgjedhim.
Serbia është aty, Kosova është aty, nuk shkon asgjëkundi. Historia do më japi të drejtë mua, jo juve.”, tha Rama
