Kryetari i Këshillit Kombëtar Shqiptar, Ragmi Mustafi deklaron se marrëveshja mes Kosovës dhe Serbisë do të ndikojë në jetën e qytetarëve të Luginës. Sipas tij, banorët e Preshevës, Medvegjës dhe Bujanocit duhet të kenë të drejta të barabarta, njësoj si banorët e katër komunave veriore të Kosovës. Në intervistën për KosovaPress ai flet edhe për marrëveshjen e përgjithshme prej gjashtë pikave për normalizimin e raporteve, ku thotë se nuk duhet të krijohen standarde të dyfishta për komunitetet.
Pas takimit në Bruksel, presidenti i Serbisë Aleksandër Vuçiq ka përmendur gjashtë pikat e marrëveshjes finale, që siç tha ai, i ka paraqitur kryeministri i Kosovës, Albin Kurti.
Ani pse këto nuk janë konfirmuar nga qeveria, Mustafi kërkon vëmendjen ndaj qytetarëve të Luginës së Preshevës.
Mustafi: S’ka asnjë arsye që serbët në Kosovë të kenë më shumë liri
“S’ka asnjë arsye që serbët në Kosovë të kenë më shumë liri, më shumë të drejta dhe më shumë barazi se sa shqiptarët e Luginës së Preshevës. Nuk ka asnjë arsyeje që t’i mohohet kjo shqiptarëve të Luginës së Preshevës, përderisa mund të arrihet një marrëveshje... E gjithë kjo traumë dhe pasojat traumatike që kanë ndodhur gjatë gjithë kësaj kohe për një marrëveshje të paqes, për një marrëveshje të qëndrueshme mes Kosovës dhe Serbisë e që do të krijonte hapësirë më të madhe për progres edhe të Serbisë dhe Kosovës, duke i trajtuar me standarde të njëjta komunitetet si në Serbi ashtu edhe në Kosovë, sepse standardet e dyfishta vërtet do të krijojnë hapësirë për tensione dhe konflikte të ardhshme”, është shprehur ai.
Teksa flet për arritjen e marrëveshjes finale, ai thekson se ka pasur pasoja të jashtëzakonshme të moszbatimit të marrëveshjes për njohjen reciproke të diplomave.
Mustafi: Është e rëndësishme që të arrihet një marrëveshje e qëndrueshme
“Është jashtëzakonisht e rëndësishme që marrëveshjet të implementohen, po aq sa konsideroj që është jashtëzakonisht e rëndësishme që të arrihet një marrëveshje e qëndrueshme, ndërkombëtarisht e obligueshme. Dhe përfundimisht të ketë paqe të qëndrueshme dhe gjeneratave që vijnë t’i lënë hapësirë për progres, për më shumë liri e barazi dhe për një të ardhme evropiane”, deklaron Mustafi.
Kryetari i Këshillit Kombëtar Shqiptar shton se kërkesa e vazhdueshme e banorëve të Luginës është që të ketë reciprocitet për të drejtat e tyre krahas atyre të banorëve të katër komunave veriore të Kosovës.
Mustafi: Marrëveshja mes Kosovës dhe Serbisë do të kishte impakt të drejtpërdrejt në jetën e qytetarëve të Luginës
“Shqiptarët e Luginës së Preshevës janë në vështirësi të pakuptimta. Madje, gjendja e shqiptarëve të Luginës së Preshevës vazhdimisht vështirësohet edhe më shumë sa i përket realizimit të të drejtave individuale dhe kolektive. Andaj, edhe një marrëveshje gjithëpërfshirëse mes Kosovës dhe Serbisë do të kishte impakt të drejtpërdrejt në jetën e qytetarëve të Luginës së Preshevës”, thotë ai për KosovaPress.
Në intervistën për KosovaPress flet edhe reciprocitetin për targat dhe për dokumente, ku deklaron se Kosova dhe Serbia duhet të arrijnë një marrëveshje para datës 1 shtator.
Mustafi: Shpresojmë se mes Kosovës dhe Serbisë të arrihet një marrëveshje deri më 1 shtator
“Konsideroj që është në të drejtën e saj kushtetuese, shtetërore të Republikës së Kosovës që të vendos masë të reciprocitetit ndaj Republikës së Serbisë. Por, që njëkohësisht shpresojmë se mes Kosovës dhe Serbisë të arrihet një marrëveshje deri më 1 shtator, në mënyrë që të shtensionohet situata që është krijuar tashmë... Shpresoj, është e rëndësishme që të arrihet një marrëveshje e cila do të lehtësonte të vendoste hapësirë më shumë të lëvizjes së njerëzve, mallrave, kapitaleve”, thekson ai.
Qeveria e Kosovës e ka shtyrë për një muaj zbatimin e vendimit për masat e reciprocitetit me Serbinë për dokumentet e identifikimit dhe përdorimit të targave.
Ndërkaq, në gjashtë pikat e prezantuara në kuadër të marrëveshjes finale përmendet edhe respektimi për të drejtat e serbëve dhe shqiptarëve në Luginën e Preshevës. Derisa kryeministri i Kosovës pritet që pas pak të deklarohet për herë të parë për takimin e 18 gushtit në Bruksel.
Ndryshe, në vendin tonë po qëndrojnë emisari i ShBA-së për Ballkanin Perëndimor, Gabriel Escobar dhe ai i BE-së, Miroslav Lajçak, të cilët gjatë ditës së sotme do të kenë takime me krerët shtetërorë dhe përfaqësues të opozitës në përpjekje për të gjetur një zgjidhje për targat dhe letërnjoftimet.
