Nga Amerika erdhi si pasardhës i Arben Vitisë.
Si drejtues i dikasterit të shëndetësisë, për pak javë mbush një vit.
Rifat Latifi, përgjatë kësaj periudhe, shpesh herë zhvilloi vizita jashtë vendit, të cilat zgjasnin edhe me javë.
Më e gjata rezulton të jetë një vizitë në Shtetet e Bashkuara të Amerikës, plotë tri javë.
SHBA-ja, ishte destinacion i të parit të Shëndetësisë, tri herë brenda pak muajve.
Shqipëria, Turqia, Austria e Norvegjia janë ndalesat tjera të Latifit për vizita spitalesh, konferenca shkencore e takime me studentë.
Së fundi, ishte për vizitë në Greqi, ku vizitoi spitale greke.
Përafërsisht, i bie që shefi i dikasterit të Shëndetësisë, të paktën një herë në muaj ka dal jashtë vendit.
Latifi konsideron se këto vizita po bëhen në kuadër të planeve për përmirësimin e gjendjes në shëndetësi.
Ndërkaq, si mungesë e përgjegjshmërisë i quajti daljet jashtë vendit të Latifit, ish-ministri i Shëndetësisë, Armend Zemaj.
Përpos LDK-së, edhe partitë tjera opozita vazhdimisht kanë kritikuar qeverisjen e dikasterit të shëndetësisë.
