Ish-ambasadori i Shqipërisë në Kosovë, Islam Lauka ka reaguar në lidhje me marrëveshjen e fundit mes Kosovës dhe Serbisë.
Sipas Laukës ky është një vendim realist i qeverisë së Kosovës, pasi është e njejta që e kërkuan ndërkombëtarët, përcjell “Bota sot”.
Gjithashtu ish-ambasadori thotë që me këtë vendim i hapet rruga diskutimit të planit franko-gjerman për normalizimin e marrëdhënieve Kosovë-Serbi.
Postimi i plotë
Vendim realist i qeverisë së Kosovës
Më së fundi, u arrit marrëveshja Kosovë-Serbi për targat: Prishtina heq dorë nga riregjistrimi i tyre, Beogradi angazhohet që të mos lëshojë targa të reja për serbët e Kosovës. Në thelb, këtë kërkonin aleatet tanë strategjikë, Brukseli dhe Uashingtoni.
Nënshkrimi i kësaj marrëveshjeje dëshmon për qëndrimin realist të qeverisë së Kosovës, e cila, duket se arrriti në përfundimin e drejtë se në situatën e tanishme gjeopolitike (konflikti në Ukrainë) është jo produktiv gozhdimi pas objektivave maksimaliste.
Me këtë vendim i hapet rruga diskutimit te planit franko-gjerman për normalizimin e marrëdhënieve Kosovë-Serbi, i cili, pavarësisht se nuk është siç ne do ta dëshironim, është më i miri i mundshëm në situatën aktuale kritike.
