Ministrja e Drejtësisë, Albulena Haxhiu në konferencën përmbyllëse të këtij viti, e ka konsideruar 2022-tën si vit të suksesshëm.
Ajo ka folur për reformat penale dhe civile, angazhimi e MD-së ndaj parandalimit të dhunës, teksa si kryefjalë të suksesit këtë vit e ka vlerësuar Vettingun.
“Pra ka qenë vit me suksese dhe me sfida po ashtu. Kemi punuar edhe në shumë projektligje dhe një nga reformat e mëdha është edhe Ligji Prokurorial”, ka theksuar Haxhiu.
Krahas shumë punëve të bëra, ajo e ka përmendur edhe projektligjin për Byron shtetërore.
“Kemi punuar edhe në çështjet antikorrupsion. Po ashtu edhe themelimi i Institutit për krime lufte ishte ndër sukseset tona. Do të angazhohemi edhe për vitin e ardhshëm që të jemi të suksesshëm”, ka shtuar ministrja.
Ajo ka thënë se përmbyllja e prioriteteve në drejtësi do të vazhdojë edhe për gjatë vitit 2023, e ku shumë nga to, sipas saj pritet të jetësohen.
