Ish-gjyqtari i Gjykatës Kushteutese, Kadri Kryeziu, ka komentuar vendimin e 13 viteve më parë të Gjykatës Kushtetuese, e cila kishte konsideruar se Fatmir Sejdiu kishte mbajtur pa të drejtë postin e presidentit të shtetit dhe kryetarit të LDK-së.
Kryeziu ka thënë se kjo më shumë kishte të bënte me neglizhencën e Sejdiut, ndonëse thotë se ia kishin tërhequr vërejtjen se nuk mund t’i mbante të dyja postet.
“Është profesor tepër i respektuar edhe ka njohuri brilante në çështjen e së drejtës, por kur hyn në mekanizmin e qeverisjes së vendit atëherë ka mundësi nddonjëherë që të jesh neglizhent. Edhe përkundër asaj që ia kemi tërhjek vërejtjen është menduar që nuk mund të ndodhë ajo çka ka ndodhë por këto gjëra ndodhin, për shkak se si gjyqtar i Gjykatës Kushtetuese përveç në aspektin e përgatitjes profesionale me pasë edhe angazhimin qytetar, profesional edhe mos me qenë anues sepse askush nuk mund të jetë mbi ligjin”, ka thënë Kryeziu.
Sipas Kryeziut, interpretimi i Sejdiut ishte që mund t’i mbante të dyja pozitat, edhe president edhe anëtar i LDK-së.
Megjithatë, shton ai, për këtë çështje Kushtetuta nuk lejon hapësirë për dykuptimësi.
“Ne e kemi diskutu me profesorin Sejdiu por ai në bazë të interpretimit të tij ka mendu që nuk po bën ndonjë shkelje. Ai e interpretonte se mundet me qenë edhe anëtar i partisë edhe president. Kushtetuta është e qartë, nuk lejon hapësirë për dykuptimësi. Ne si profesionistë e sqarojmë nënkuptimin e Kushtetutës jo kuptimin e saj. Se kuptimin mund ta sqarojë edhe ekonomisti e çdokush tjetër. E ne i quajmë një kategori të juristëve që quhen juristë elegantë që elegancën e kanë në sqarimin e normës. Ai [Fatmir Sejdiu] ka menduar, sepse kemi qenë edhe fillestar në këtë drejtim, ka menduar që nuk vjen deri te dorëheqja. Por megjithatë e ka ba një akt pozitiv, si burrë shteti që për hir të interesave publike, nuk është asgjë të jepet dorëheqje”, ka përfunduar Kryeziu.
Sa i përket rrëzimit të ish-presidentit Pacolli, Kryeziu thotë se në këtë rast fajin e kanë pasur procedurat.
“Behgjet Pacolli nuk ka pasë faj në atë kuptimin fare. Kanë pas faj procedurat e zgjedhjes në parlament. Është një procedurë bukur e koklavitur, e komplikuar sepse duhet të jenë në vazhdimësi mbi 80 deputetë prezent dhe aty nuk kanë qenë 80 deputetë prezent dhe është nominuar si president. Por ne i kemi pranuar 43 ditë që ka qenë të gjitha vendimet të cilat i ka pasë”, ka thënë Kryeziu.
“Ne edhe si popull jemi pak neglizhent, nuk jemi shumë të koncentruar. Nuk koncentrohemi në situata të caktume sepse ne duhet me i zbatu letrat, dokumentet. Me i lexu mirë dokumentet dhe ato me i sqaru mirë. Në bazë të atyre dokumenteve pastaj me i zhvillu procedurat. Nëse nuk i shikojmë mirë ato dhe i interpretojmë ashtu siç nuk janë, mund të krijojë efekte negative dhe pasoja”, ka sqaruar tutje ai.
