Anëtari i AAK-së, Haxhi Shala, ka kërkuar nga partitë opozitare ta përkrahin mocionin e partisë së tij për shkarkimin e kryeministrit Albin Kurti, sepse në të kundërtën, sipas tij, ai do të dështojë.
“Ne si Aleancë e kemi ngritur mocionin dhe presim mbeshtetjen e opozitës, por në qoftë se partitë e tjera të opozitës nuk e mbeshtetin mocionin, ai vec se është i dështuar”, deklaroi ai.
Për daljen nga kjo krizë, ai tha se duhet edhe ndihma e ndërkombëtarëve dhe se kryeministri i Kosovës, Albin Kurti, duhet “të japë shkëndijat e para për përmirësimin e raporteve me faktorin ndërkombëtar”.
Ai e pranoi se pa mbështetjen e deputetëve të pozitës nuk mund të rrëzohet Qeveria.
“Pa disa deputetë të Lëvizjes Vetëvendosje nuk ka mundësi të rrëzohet qeveria, mirëpo veëtm duhet punuar me ‘ata’ deputetë”, u shpreh Haxhi Shala.
Shala, po ashtu, tha se refuzimi i Kurtit për t’u takuar me kryeministrin e Shqipërisë, Edi Rama, nuk i bën nder vendit.
“T’i thuhet një kryeminstri shqiptar se nuk do të presë në këto kohë të vështira me të cilat po kalon Kosova, është e rëndë”, u shpreh Shala.
Ndryshe, kujtojmë që para disa ditësh AAK nisi mocion mosbesimi ndaj qeverisë, mirëpo ende nuk ka gjetur përkrahje nga partitë opozitare.
